Elordada Bilim kúni atap ótilýde
ASTANA. 1 qyrkúıek. QazAqparat - Búgin Qazaqstan boıynsha Bilim kúni merekelenýde. Astananyń barlyq 83 mektebinde merekelik is-sharalar ótedi. Mektep tabaldyryǵyn alǵash attap otyrǵan 11 myńnan astam balǵyn úshin alǵashqy qońyraý soǵylady, dep habarlady Astana qalasynyń resmı saıtynan.
Astana qalasy ákiminiń orynbasary Aıda Balaeva № 15, 36, 61, 21 jáne 49 mektepterde, lıtseılerde bolyp, oqý mekemeleriniń muǵalimderimen jáne oqýshylarymen kezdesti.
«Búgin 92 000 astam oqýshy partaǵa otyrady. Sonyń ishinde 11 myńnan astam bala birinshi synypqa barady. Senderdiń basty maqsattaryń jaqsy bilim alyp, Qazaqstannyń laıyqty azamaty bolý. Bárimiz de óz Otanymyzdyń patrıottary bolýymyz kerek, mádenıetimizdi maqtan etip, tarıhymyzdy bilip, memlekettik tildi qurmettep, meńgerýimiz kerek. Patrıot bolý - bárimiz de maqtan etetin óz mektebimizdi, aýlamyzdy, qalamyzdy súıý bolyp tabylady»,- dedi A. Balaeva, oqýshylardy Bilim kúnimen quttyqtaı otyryp.
Onyń atap ótýinshe, búgin Astananyń barlyq mektepteri pedagogtarmen qamtamasyz etilgen. Elordada 11 142 muǵalim jumys isteıdi. Munymen qosa, bıyl 180 jas maman jumysqa qabyldandy.
«Aldaǵy 2013-2014 oqý jyly árbir pedagogıkalyq ujymnyń qyzmetindegi negizgi baǵyt - memlekettik standarttarǵa sáıkes bilim berý sapasyn arttyrý bolýy tıis»,- deıdi ol.
Qazirgi ýaqytta qalada 83 mektep jumys isteıdi. Sonyń ishinde 71 memlekettik jáne 12 jeke menshikti mektep.
«Búgin taǵy da bir jańa mektep ashyldy. № 71 mektep 1200 orynǵa eseptelgen. Jyl sońyna deıin taǵy da 2 mektep ashý josparlanǵan. Biraq oqý oryndarynyń tapshylyǵy saqtalyp otyr. Munyń basty sebepteriniń biri - halyqtyń kóshi-qony bolyp tabylady. jazda kóshi-qon protsesteriniń esebinen Astanaǵa 4 myńnan astam oqýshy keldi»,- dedi A.Balaeva.
Onyń sózine qaraǵanda, mektepter 98,4% oqýlyqtarmen qamtamasyz etilgen.
«Oqý qorynyń jaqsy saqtalýynyń arqasynda biz oqýshylardy qamtamasyz etýdi 100%-ǵa jaqyndattyq»,- dedi ol.
Budan basqa, elordanyń barlyq mektepterinde ystyq tamaq beriledi, bul balanyń aǵzasyn qalyptastyrýda mańyzdy rol atqarady.
«Barlyq mektepterde tamaq berý uıymdastyryldy. Ashanalar jańǵyrtylǵan tehnıkalyq qondyrǵylarmen jabdyqtaldy. Oqýshylardyń jalpy sanynyń 75,5% ystyq tamaqpen, 24,5 % býfettik tamaqtandyrýmen qamtylǵan»,- dedi qala ákiminiń orynbasary.
Búgingi merekelik is-sharalar Bilim kúnine jáne Patrıotızm kúnine arnalǵan synyptyq saǵattarmen jalǵasty. Bul sabaqtardyń maqsaty barsha qazaqstandyqtardyń basty qundylyqtaryn - elimizdiń egemendigi men táýelsizdigin, elimizdiń qalyptasýy men damýyndaǵy Tuńǵysh Prezıdentimizdiń rolin oqýshylardyń sanasyna bekitý bolyp tabylady.
