Elordada bilim berý júıesindegi ınnovatsııalyq úderister talqylandy (FOTO)
ASTANA. QazAqparat - Búgin Astanada «Bilim berý ınnovatsııalary: izdenis jáne sheshimder» atty ІІ halyqaralyq konferentsııa ótti.
«Búgingi konferentsııa aıasynda qazirgi kezdegi kókeıkesti úsh taqyryp boıynsha sektsııalarǵa bólinip, talqylaýlar júrgizdik. Birinshisi - «Bilim berý júıesindegi ınnovatsııalyq úderister», ekinshi taqyryp - «Inklıýzıvti bilim: perspektıvalary jáne máseleleri» jáne sońǵysy - «Bilim berýdiń qurylymdyq reformalary jaǵdaıyndaǵy pedagogıkalyq ólshemder». Atap aıtqanda, bilim berý júıesindegi ınnovatsııalar baǵytynda jalpy bilim beretin mektepterdegi memlekettik jalpyǵa mindetti jańartylǵan bilim mazmunyndaǵy standart talqylandy. Sonymen qatar osy júıedegi sáıkes, pedagogıkalyq joǵary oqý oryndaryna, kásiptik oqý oryndarynda mamandar máselesi qaralyp, olardyń bilim berý baǵdarlamalaryn ázirleýi jáne onyń ishindegi mazmundyq baǵyttar boıynsha jańartý sharalary talqylandy», -dedi Y. Altynsarın atyndaǵy Ulttyq bilim akademııasy Orta bilim ınstıtýtynyń dırektory Esenkeldi Tuıaqov.
Onyń sózine qaraǵanda, konferentsııada Reseı, Germanııa, Fınlıandııa jáne AQSh-tan kelgen mamandar ózderiniń tájirıbelerimen bólisip, pikir almasýda.
Munymen qosa, konferentsııaǵa qatysýshylar bilim berý júıesin jańartý jaǵdaıyndaǵy muǵalimderdi kásibı daıarlaý men pedagogtar jáne bilim salasyndaǵy menedjerlerdiń ınnovatsııalyq qyzmeti týraly máselelerdi talqylady.
Sharada Y. Altynsarın atyndaǵy Ulttyq bilim akademııasynyń prezıdenti Janbol Jylbaev, DAAD lektory Shtefan Kel (Geramanııa) baıandama jasady.
