Elordada bıyl jeti iri abattandyrý jobasy júzege asyrylady
ASTANA. KAZINFORM — Astanada bıyl jeti iri abattandyrý jobasyn júzege asyrý josparlanǵan. Bul týraly Astana qalasy Qorshaǵan ortany qorǵaý jáne tabıǵatty paıdalaný basqarmasynyń basshysy Dáýlet Dosqulov Qoǵamdyq keńes otyrysynda málim etti.
Onyń aıtýynsha, qazir Mánshúk alleıasynyń birinshi kezeńiniń qurylysy aıaqtalýǵa jaqyn.
— Greenline alleıasynyń ekinshi kezeńinde de qurylys qarqyndy júrip jatyr. Bul aýmaqqa 2 myńnan astam aǵash otyrǵyzyldy. Vokzal mańyndaǵy saıabaqta da qurylys pen kógaldandyrý jumystary jalǵasyp jatyr, — dedi Dáýlet Dosqulov.
Ol bıyl Kishi Taldykóldiń besinshi ýchaskesinde ekopark jobasyn iske asyrý bastalǵanyn aıtty.
— Bul aýmaqta 3 myńnan astam iri aǵash pen 100 myńnan astam kópjyldyq gúl otyrǵyzý josparlanǵan. Sonymen qatar Qaldaıaqov kóshesin kógaldandyrý jumystary júrgizilip jatyr. Sondaı-aq Beıbitshilik jáne kelisim saıabaǵyn abattandyrýdyń ekinshi kezeńi júzege asyrylady, onda shamamen 3 myń aǵash otyrǵyzý kózdelgen, — dedi basqarma basshysy.
Eske salaıyq, buǵan deıin Astana ákimdigi bıyl elordanyń birneshe aýdanynda jańa saıabaqtar men qoǵamdyq keńistikter salynatynyn málimdegen edi.
