Elordada bıyl qandaı kósheler salynatyny belgili boldy
ASTANA. KAZINFORM — Astana qalasynyń ákimi Jeńis Qasymbek Instagram paraqshasynda bıyl salynatyn jáne jóndeý júrgiziletin kósheler týraly jazdy.
Qalada aýa raıy jylynǵan kúnnen bastap joldardy jóndeý jáne salý jumysy qolǵa alyndy. Bıyl jalpy uzyndyǵy 60 km bolatyn shamamen 50 kósheni jóndeý josparlanǵan. Sol sııaqty shuńqyrlardy, trotýarlardy jóndeý, jol belgilerin salý jáne t. b. jumys qatar júrgizilip jatyr.
Osylaısha, bıyl sáýir aıynan bastap myna kóshelerde jumys bastaldy:
— E68 kóshesi Á. Bekturov kóshesinen Tóle bı kóshesine deıin;
— B. Soqpaqbaev kóshesiniń Sh. Beısekova kóshesinen K. Kúmisbekov kóshesine deıingi aralyǵyndaǵy qurylysy jalǵasty;
— «Tilendıev dańǵylynan Beıbarys Sultan kóshesine deıingi ýchaskede Abaıdyń 150 jyldyǵy kóshesin salý» jobasy iske asyp jatyr.
— Máńgilik El dańǵyly men Syǵanaq kóshesi;
— Kenesary kóshesi Á. Sembınov kóshesinen Saryarqa dańǵylyna deıin (bul rette Kenesary kóshesinde 2025 jyly E. Brýsılovskıı kóshesinen Á. Sembınov kóshesine deıingi aralyqta jumys júrgizilgen);
— Respýblıka dańǵyly A. Imanov kóshesinen temirjol vokzalyna deıin;
— Aqan seri kóshesi Tilendıev dańǵylynan Qaramende bı Shaqauly kóshesine deıin;
— Shaımerdenov kóshesi Nájimedenov kóshesinen A. Baıtursynuly kóshesine deıin jáne t. b.
Beısekova men Tilendıev kósheleriniń qıylysynda eki deńgeıli jol aıryǵyn salý jumysy júrip jatyr. Nysanda ınjenerlik jelilerdi tartý jáne aralyq metall qurylymyn montajdaý jumysy júrgizilip jatyr. Bıyl jyl sońyna deıin qurylys jumysyn aıaqtaý josparlanyp otyr.
Q. Muhamedhanov kóshesiniń qurylysy Sh. Aıtmatov kóshesinen Qorǵaljyn tasjolyna deıingi aralyǵynda jalǵasyp jatyr.
Ótken jyly bul ýchaskede kólik qozǵalysy qamtamasyz etilgen. Bıyl jol salýdy jáne irgeles aýmaqty abattandyrýdy qosa alǵanda, barlyq jumysty tolyqtaı aıaqtaý josparlanyp otyr.
Sh. Aıtmatov kóshesinde segiz jolaqty magıstraldi jol arqyly kólik qozǵalysy qamtamasyz etildi. Aıtmatov kóshesiniń ashylýy nátıjesinde Turan jáne Qabanbaı batyr dańǵyldary, sondaı-aq Syǵanaq pen Q. Muhamedhanov kósheleri sııaqty negizgi magıstraldarda kólik aǵyny edáýir azaıdy, bul qalanyń jańa bóligi úshin asa mańyzdy.
Sonymen qatar, bıyl abattandyrý, baǵdarsham ornatý jáne elektrmen jabdyqtaý, nóser kárizi jelilerin tartý jumysy jalǵasady.
Táýelsizdik dańǵylynyń Qabanbaı batyr dańǵylynan Uly Dala dańǵylyna deıingi ýchaskesiniń qurylysy bastaldy.
Bul kóshe segiz jolaqty magıstral bolyp sanalady.
Atalǵan joldyń arqasynda kólik aǵyny qaıta rettelip, Máńgilik El men Turan dańǵyldarynda qozǵalys jyldamdaıdy dep kútilip otyr.
Qazirgi ýaqytta 1-kezeń júzege asyp jatyr — Táýelsizdik dańǵylynyń Qabanbaı batyr dańǵylynan E485 kóshesine deıingi ýchaskesiniń aralyǵy.
— Jol salý aýmaǵynda normatıvtik talaptarǵa sáıkes kommýnaldyq jelilerdi (sýmen jabdyqtaý, káriz, elektrmen, jylýmen jabdyqtaý) tóseý jumysy júrgizilip jatyr. Uly Dala dańǵylynyń (A-52 kóshesi) Sh. Qaldaıaqov kóshesinen Qordaı kóshesine deıingi ýchaskesinde qurylys jumysy júrgizilip jatyr. Osyǵan deıin Sh. Qaldaıaqov kóshesinen A. Baıtursynuly kóshesine deıingi aralyqta kólik qozǵalysy qamtamasyz etilgen. Qazirgi ýaqytta osy ýchaskede joldyń joǵarǵy qabatyn salý arqyly abattandyrý jumysy júrgizilip jatyr, — dep jazdy Jeńis Qasymbek.
Osyǵan deıin elorda ákimi Jeńis Qasymbek Astana LRT-nyń testilik qoldanylý barysymen, júıeniń negizgi jumys parametrlerimen jáne ınfraqurylymnyń daıyndyǵymen tanysqanyn jazǵanbyz.