Elordada bıiktigi 6 metrlik eko-shyrsha toqylyp jatyr
NUR-SULTAN. QazAqparat - Nur-Sultanda bıiktigi 6 metrlik eko-shyrshany toqý boıynsha fleshmob bastaý aldy. Búginde chellendjge elimizdiń búkil óńirinen eriktiler jumylýda. QazAqparat bul týraly elorda ákimdiginiń Іshki saıasat basqarmasyna silteme jasap habarlaıdy.
«Karantındik shekteýler men oqshaýlaý qol qýsyryp otyrýǵa sebep emes. Úıde otyryp, shyǵarmashylyqpen aınalysa alasyz, ómir boıy armandaǵan nárseni úırene alasyz. Toqylǵan jyly shyrsha adamdardy biriktiredi – jańajyldyq atmosferany týdyryp, 2021 jyldy jumyla qarsy alýǵa múmkindik beredi», - dep atap ótti aktsııa uıymdastyrýshysy, áleýmettik kásipker Rahıma Muqysheva.
«Bıyl bizge Nur-Sultan qalasynyń ákimdigi qoldaý kórsetti. Biz toqyma jip satyp aldyq. Demeýshiler de paıda bolady. Bul joly aktsııaǵa Petropavl, Atyraý jáne Taraz qosyldy. Búkil Qazaqstan shyrshany jumyla toqyp jatyrmyz. Sonymen qatar, mektepter de qatysýda. Biz qazir «Qoldaý« qoǵamdyq birlestigimen jumys istep jatyrmyz, olar qazirdiń ózinde mektepterge sheberlik synyptaryn uıymdastyrýda»,- dedi Rahıma Muqysheva.
Jańa jylǵa arnalǵan erekshe shyrsha bólshektelip toqylyp, keıin biriktiriledi. Oǵan barlyq azamat qatysa alady. 19-25 jeltoqsan aralyǵynda kún saıyn saǵat 10:00-den 15:00-ge deıin «Báıterek» monýmentiniń ishinde barlyq sanıtarlyq normalar saqtala otyryp, toqýdan sheberlik synyptary ótkiziledi.
«Quraq kórpe stılindegi eko-shyrsha» jobasy daǵdarys kezeńindegi ózekti máselelerdi sheshýge kómektesedi. Olardyń biri – jastardy, ásirese az qamtylǵan, jumyssyz, múgedek jáne áleýmettik osal toptardyń basqa da sanattaryndaǵy jastardy oqýǵa, qosymsha tabys tabýǵa, úıden jumys isteýge, shaǵyn óndiristi jáne kreatıvti ekonomıkany damytýǵa yntalandyrý. Sonymen qatar, toqý jumystary paıdaly demalys syılap, stress pen depressııany jeńildetýge kómektesedi.
Toqyma jipten jasalǵan jańa óner týyndysynyń bıiktigi 6 metr bolmaq. Toqyma áshekeılerdi jasaýǵa mektep oqýshylary men olardyń ata-analary, qarttar úıiniń zeınetkerleri, balalar úıleri, qoǵamdyq qorlar qatysady. Shyrshany bezendirýge arnalǵan zattar da 20/20 santımetr túrli-tústi toqylǵan kvadrattardan jasalǵan.
Joba aıasynda shyrsha bólshekterin eń kóp toqyǵan rekord ıesi anyqtalatyn bolady. Sondaı-aq qundy syılyqtar men lotereıa oınatylady.
Fleshmobty Nur-Sultan qalasy ákimdiginiń qoldaýymen «Pýt masterstva» qoǵamdyq qory men «Bergen» áleýmettik sheberhanasy uıymdastyrýda. Joba «Rýhanı jańǵyrý» ulttyq baǵdarlamasy aıasynda Qazaqstandaǵy eriktiler jylyna arnalǵan.
