Elordada bıiktigi 16 metrdi quraıtyn muz tóbeshik paıda bolady
ASTANA. QazAqparat - Táýelsizdik kúni qarsańynda elordada shańǵy maýsymy resmı túrde ashylady, dep habarlaıdy elorda ákimdiginiń resmı saıty.
Qazirgi tańda QR Tuńǵysh Prezıdenti kúnine, elordany Astanaǵa kóshirý kúnine jáne Táýelsizdik kúnine daıyndyq jumystary belsendi túrde júrgizilip jatyr. Ár merekege oraı otshashýlar, kórmeler men kontsertter sııaqty mádenı buqaralyq is-sharalardy ashyq jáne jabyq alańdarda ótkizý josparlanǵan.
«Biz aýdannyń aýmaǵynda turatyn halyqtyń áleýmettik osal toptaryndaǵy otbasylarǵa erekshe kóńil bólemiz. Olardy qalada ótetin barlyq is-sharalarǵa shaqyramyz. Bilim berý mekemeleriniń barlyǵynda ashyq esik kúnderi ótkiziledi. Merekelerge daıyndyq jumystary aýdanda qyzý júrip jatyr», - dedi jeltoqsan aıynda atalyp ótiletin meıramdardy merekeleý taqyrybyna arnalǵan brıfıngte Almaty aýdany ákiminiń orynbasary Tynysbek Arashapov.
Táýelsizdik kúni qarsańynda, ıaǵnı 15 jeltoqsanda ótetin «Alǵashqy qar» sharasynda shańǵy maýsymy resmı túrde ashylady dep kútilýde. Bul kúni elordanyń botanıkalyq baǵyndaǵy, Trıatlon saıabaǵyndaǵy, Prezıdenttik jáne Jeruıyq saıabaqtaryndaǵy shańǵy trassalary óz jumysyn bastamaq.
«Qysqy demalysqa arnalǵan barlyq ashyq alańdar tegin bolady. Olardyń arasynda muz aıdyndary, muz tóbeshikter men shańǵy trassalary bar. «Shabyt» shyǵarmashylyq saraıynyń aldyndaǵy Táýelsizdik alańynda qaladaǵy eń úlken muz aıdyny uıymdastyrylady. Prezıdenttik saıabaqta bıiktigi 16 metrdi quraıtyn muz tóbeshik qoıylady. Ol qaladaǵy eń bıik tóbeshik bolsa kerek. Bul - qala men onyń turǵyndaryna arnalǵan syılyq. Biz barlyq jumystardy 16 jeltoqsanǵa deıin aıaqtaýdy josparlap otyrmyz. Mektep aýmaqtarynda qysqy sport túrlerimen aınalysýǵa múmkindik beretin barlyq jaǵdaı jasalady», - dedi Tynysbek Arashapov.
