Elordada bıik jylý qubyrynan sekirmek bolǵan er adam qutqaryldy
NUR-SULTAN. QazAqparat - Polıtsııa qyzmetkerleri Nur-Sultanda ózine qol jumsamaq bolǵan adamdy qutqarý operatsııasyn uıymdastyrdy, dep habarlaıdy QazAqparat.
«Qala turǵyny «102» arnasyna habarlasyp, Jansúgirov kóshesindegi jylý qubyrlarynyń arkasynda er adamnyń otyrǵany jáne onyń sekirmek oıy bar ekendigin aıtqan. Quramynda polıtsııa aǵa leıtenanty Rýslan Abdyqalyqov jáne polıtsııa leıtenanty Rolan Atabaev bar patrýldik polıtsııanyń ekıpajy oqıǵa ornyna birinshi kelgen. Arkada mas kúıindegi er adamdy kóredi. Ol tómenge túsýden úzildi-kesildi bas tartyp, óz-ózine qol jumsaıtynyn aıtqan. Bir jarym saǵatqa sozylǵan qutqarý operatsııasy barysynda er adamnyń súıiktisimen urys-keris bolǵany anyqtaldy. Osylaısha, ol jaqsy kóretin adamynyń nazaryn ózine aýdarǵysy kelgen», - delingen Polıtsııa departamenti málimetinde.
Oqıǵa ornynda polıtseılermen birge tótenshe jaǵdaılar qyzmetkerleri jáne jedel járdem brıgadasy jumys istedi. Er adam men qutqarýshylardy qulap ketýden saqtaý úshin úrlengen qutqarý jastyǵy arkanyń astyna tóselgen.
«Jigittiń týystarymen de telefon arqyly habarlasyp, olar arqyly tómenge túsýge kóndirgisi kelgen edi, biraq esh nátıje bolmaǵan. Qyzmetkerler oǵan jylý jolynyń qubyry arqyly jaqyndap bardy. Sosyn ınspektor Rýslan Abdyqalyqov ony ustap qalýǵa tyrysady, alaıda ekeýi birdeı qutqarý batýtyna birge qulaǵan. Sonymen qatar, adamdy qutqarýda polıtsııa qyzmetkerlerine Medıtsınalyq-áleýmettik ońaltý ortalyǵynyń sanıtary Jandos Saparov kómek kórsetken. Atalǵan ortalyqqa jatqyzylǵan 27 jastaǵy jigitke medıtsınalyq jáne psıhologııalyq kómek kórsetildi», - dep atalyp ótken habarlamada.
