Elordada Bıbigúl Tólegenovanyń 90 jyldyǵyna arnalǵan kesh ótedi
NUR-SULTAN. QazAqparat - 3 jeltoqsan kúni Nur-Sultan qalasynda opera sahnasynyń ańyzǵa aınalǵan tulǵasy, SSSR jáne Qazaqstannyń Halyq ártisi Bıbigúl Tólegenovanyń 90 jyldyq mereıtoıyna arnalǵan shyǵarmashylyq kesh ótedi, dep habarlaıdy QazAqparat.
Kesh «Astana Opera» memlekettik opera jáne balet teatrynda ótedi. «Tamasha lırıkalyq-koloratýralyq soprano ıesi Bıbigúl Tólegenovanyń shákirtteri men «Astana Operanyń» solısteri – Qazaqstannyń eńbek sińirgen ártisi Jannat Baqtaı, Qazaqstannyń eńbek sińirgen qaıratkerleri Saltanat Ahmetova, Jámılıa Jarqymbaeva, Dına Hamzına, Medet Chotabaev, Meıir Baınesh, Janat Shybyqbaev, Azamat Jyltyrgózov, Bashqurtstannyń eńbek sińirgen ártisi Alfııa Karımova, Gúljanat Sapaqova, Elena Nızamýtdınova, Gúldana Aldadosova jáne taǵy basqalar keshke rýhanı atmosfera syılaıdy. Kontserttiń shaqyrylǵan qonaǵy – Bıbigúl Tólegenova atyndaǵy baıqaýdyń Gran-prı ıegeri (2019 j.), keremet tenor, dúnıejúzine tanymal ánshi Kozımo Oreste (Italııa)», - dedi teatrdyń baspasóz qyzmetinen.
Kelgen qonaqtar aldynda Bıbigúl Tólegenova da óner kórsetetin bolady.
«Súıikti tyńdarmandarymnyń mahabbaty qashan da meniń shyǵarmashalyǵyma berilgen úlken baǵa. Sondyqtan olardyń aldynda orasan zor jaýapkershilikti sezinemin jáne osy kontsertti qymbat tyńdarmandarymnyń aldyndaǵy esebim dep sanaımyn. Bul kúni menimen birge sahna tórine kópshiligi bıyl onjyldyq mereıtoıy atalyp ótken baıqaýymnyń laýrettary bolyp tabylatyn «Astana Opera» solısteri shyǵady», – dedi Bıbigúl Tólegenova.
Sonymen qatar Qazaqstannyń eńbek sińirgen qaıratkerleri Gaýhar Ýsına, Ánel Rústemova, Taıyr Ǵataýov, halyqaralyq baıqaýlardyń laýreattary Oljas Tarlanov, Nazır Zaetov, Bostan Qojabekov, Sultanbek Ǵumardyń oryndaýyndaǵy tamasha nómirler keshtiń kórkin asha túspek.
«Astana Opera» sımfonııalyq orkestri, hory jáne baleti. Dırıjerler – Qazaqstannyń eńbek sińirgen qaıratkeri Abzal Muhıtdın, Arman Orazǵalıev. Bas hormeıster – Qazaqstannyń eńbek sińirgen qaıratkeri Erjan Dáýitov. Balet trýppasynyń kórkemdik jetekshisi – Reseıdiń Halyq ártisi Altynaı Asylmuratova. Rejısseri – Natalıa Kagadıı.
Baǵdarlamada qazaqstandyq jáne sheteldik kompozıtorlardyń operalarynan arııalar, halyq ánderi, romanstar, orkestrlik shyǵarmalar, horeografııalyq nómirler bar.
«Bul shyǵarmashylyq kesh ártisterdiń uly ánshige jasaǵan mýzykalyq tartýy bolmaq», - dep atap ótti teatrdan.
