Elordada beıneleý óneri damýynyń jarty ǵasyrlyq tarıhyn sıpattaıtyn kórme ashyldy
ASTANA. 23 shilde. QazAqparat - Elordada Táýelsizdik saraıynda Qazaqstanda beıneleý óneri damýynyń jarty ǵasyrlyq tarıhyn sıpattaıtyn «Ot sots.realızma do moderna» kórmesiniń tusaýy kesildi.
Bul týraly astana.kz saıty habarlaıdy.
Qazirgi zaman óneri galereıasynda elimizdegi beıneleý óneriniń 60-shy jyldardan osy kúnge deıingi týyndylary qoıylǵan. Kórermenderdiń nazaryna kórkem sýret, músin, dekoratıvtik-qoldanbaly ónerdiń 100-den astam eńbegi usynylǵan.
Ekspozıtsııaǵa O.Tańsyqbaev, R.Vıko, A.Ismaılov, L.Frolov, K. Kýznetsov ssııaqty sýretshilerdiń sots.realızm stılinde salynǵan, kommýnıstik qoǵamdy qurýǵa jáne Qazaqstannyń tabıǵatyna arnalǵan 60-shy jyldardaǵy týyndylary shyǵarylǵan. M.Kalımovtyń 70-shi jyldardaǵy «Lıza» portreti men «Balbal» kameralyq eńbekteri, R.Sahı peızajy, E.Tólepbaev, J.Natbaev jáne K.Amanovty 80-shi jyldardaǵy polotnolary qoıylǵan.
Budan basqa, A.Aqanaev, N.Býbe, S.Smaǵulov jáne A.Esdáýletovtiń HH ǵasyrdyń sońyndaǵy shyǵarmashylyq jumystary usynylǵan.
Ekspozıtsııaǵa qoıylǵan kartınalardyń basym bóligi sońǵy on jyldyń ishinde salynǵan. Olardyń avtorlary - G.Qarjasov, A.Smaǵulova, B.Býrdesbekov, A.Qazyǵulov, M.Sydyqov, A.Esimova, A.Qulbaı, A.Dýzelhanov, Z.Qojamqulov, A.Shahmardan syndy sýretshiler.
«Kórmege R.Ahmetjanovanyń dekoratıvtik-qoldanbaly óner týyndylary - shı, Z.Smaǵulova men D.Qasteevanyń osy kúnderi toqylǵan tús kilemi qoıylǵan. Sheberler qazaqtyń ejelgi materıalyn qazirgi zamanǵa saı úlgide dızaınerlik jáne ıntererlik áser bere otyryp, paıdalana bilgen»,- deıdi uıymdastyrýshylar.
Astanalyq músinshiler T. Ermekov pen K. Nurbatyrov usaq plastıkany qoldanǵan.
Kórme Táýelsizdik saraıynda 15 tamyzǵa deıin jalǵasady.
