Elordada beınebaqylaý kamerasyna jaýapty bir ǵana operatordy qaldyrý usynyldy
Qalalyq máslıhattyń kezekti otyrysynda hatshy Erlan Kanalımov qaýipsizdik máselesin kótere kele, elordada beınebaqylaý kameralary qyzmetin bir ǵana mekemege júkteý kerektigi týraly usynys bildirdi.
«Memlekettik mekeme, áleýmettik nemese qoǵamdyq oryndarǵa beınebaqylaý kamerasyn ornatýdyń artynda ulttyq qaýipsizdik tur. Al biz ulttyq qaýipsizdikti aldyq ta jeke menshikke bere saldyq, kim kóringen qyzmet kórsetip jatyr. Jeke uıymdardyń qaýipsizdikti qamtamasyz etýge ruqsaty bar ma? Shamasy jetkilikti me? Olar kúsh qurylymdary uıymdarynyń buıryqtarymen tanys pa? Mine, másele qaıda jatyr. Sondyqtan qaýipsizdikke bir ǵana operator jaýap berse degen usynys bar. Múmkin memlekettik bolar. Osy oraıda tsıfrlandyrý jáne memlekettik qyzmet basqarmasyna beınebaqylaý kameralar qyzmetine jaýap beretin bir ǵana operatordy belgilep, taǵaıyndasa deımiz», - dedi qalalyq máslıhat hatshysy.
Atalǵan máselege qatysty Nur-Sultan qalasynyń tsıfrlandyrý jáne memlekettik qyzmet basqarmasy basshysy Botagóz Qasabek túsinik berdi.
«Búginde qaladaǵy beınebaqylaý kameralarynyń jumysyna jaýapty 4 iri merdiger uıym bar. Qaýipsizdik máselesine kelsek, memlekettik mańyzy bar nysandarǵa qyzmet kórsetetin kompanııalarǵa arnaıy talap qoıylady. Olar ulttyq qaýipsizdik komıtetiniń qatań baqylaýynda. Men aıtyp otyrǵan 4 merdiger uıym da talapqa saı jumys isteıdi. Qazir beınebaqylaý kameralaryna túsken jazbaǵa qoljetimdilik jaǵy qatańdatyldy. ıAǵnı «Sergek» nemese basqa kameraǵa túsken vıdeoǵa kez kelgen adam qol jetkize almaıdy», - deıdi ol.
Buǵan deıin atalǵan basqarma basshysy elordada mıtıng ótetin alańdarǵa beınebaqylaý kamerasy qoıylǵanyn aıtty.
