Elordada beıne baqylaý kameralarynyń kómegimen 174 qylmys ashyldy
ASTANA. QazAqparat - Elordada ornatylǵan beıne baqylaý kameralarynyń kómegimen 174 qylmys ashyldy. Bul týraly búgin Astana qalalyq ІІD Jergilikti polıtsııa qyzmetiniń basshysy Baqytjan Malybaev málim etti, dep habarlaıdy QazAqparat.
«Qazirgi ýaqytta Astana qalalyq ІІD jedel basqarý ortalyǵyna 797 beıne baqylaý kameralarynan aqparattar kúni-túni kelip túsedi. Olardyń kómegimen 174 qylmystyń beti ashylyp, 33 myńnan astam ákimshilik quqyq buzýshylyq anyqtaldy. Onyń ishinde 10 myńnan astam jol júrý erejesin buzý bar»,- dedi Malybaev.
Onyń aıtýynsha, beıne baqylaý júıesin keńinen paıdalaný qaladaǵy quqyq buzýshylyqtyń deńgeıin aıtarlyqtaı tómendetip otyr. Máselen qoǵamdyq oryndardaǵy qylmystar 21 paıyzǵa, qala kóshelerindegi qylmystar 32 paıyzǵa azaıdy. Sonymen qatar jol-kólik apattarynyń sany da 20 paıyzǵa kemı tústi.
«Buǵan qosa ýchaskelik polıtsııa qyzmetkerleri ózgeniń múlkiniń urlanýynyń aldyn alý, kishigirim quqyq buzýshylyqqa «nóldik tózimdilik» ustanymyn júzege asyrý aıasynda halyq arasynda beıne baqylaý kameralaryn ornatý boıynsha naqty jumystar júrgizýde. Búgingi kúni 5 myńnan astam kamera ornatyldy. Onyń ishinde qaýipsiz aýla baǵdarlamasy aıasynda 403 kamera, memlekettik-jekeshelik seriktestik esebinen 233 kamera, PIK-ter men turǵyndardyń qarjysyna - 5151. 1380 turǵyn úı beıne baqylaýmen qamtylǵan. 5770 kamera úılerdiń kire berisine ornatylǵan», - dedi jergilikti polıtsııa qyzmetiniń basshysy.
Aıta keterligi, aǵymdaǵy jyldyń sońyna deıin elorda kóshelerinde 10 myń kamera ornatylatyn bolady.
