Elordada beımálim er adam krannyń basyna shyǵyp aldy
ASTANA. QazAqparat – Astanada belgisiz er adam krannyń basyna shyǵyp alǵan. Qazir onyń sebebi anyqtalyp jatyr, dep habarlaıdy QazAqparat tilshisi qalalyq polıtsııa departamentiniń baspasóz qyzmetine silteme jasap.
«24 sáýir saǵat 11.39-da «102» arnasyna belgisiz er adamnyń kran munarasyna shyǵyp alǵany týraly habar keldi. Oqıǵa ornyna jedel qyzmet jiberildi. Qoǵamdyq tártipti buzýshy is-áreketiniń sebebi anyqtalyp jatyr. Onyń nátıjesi boıynsha quqyqtyq baǵa beriledi», - delingen resmı habarlamada.
Eske salsaq, ótken jyly Astanada osyǵan uqsas jaǵdaı bolǵan edi. Keıin kran basyna shyqqan er adam 5 táýlikke qamaldy.
Er adam Taraz qalasynyń quqyq qorǵaý organdarymen arada týyndaǵan problemaǵa nazar aýdarý maqsatynda qurylys kranynyń tóbesine shyǵyp alǵan.
