Elordada bes kún ishinde izdeýde júrgen 14 qylmysker ustaldy
NUR-SULTAN. QazAqparat – Nur-Sultan qalasynda «Mıgrant» profılaktıkalyq is-sharasyn ótkizý kezinde izdeýde júrgen 14 qylmysker ustaldy, dep habarlaıdy QazAqparat qalalyq PD baspasóz qyzmetine silteme jasap.
Onyń biri –memleketaralyq izdeýde júrgen 29 jastaǵy RF azamaty.
Jas jigittiń Reseıde tergeýden jasyrynyp, 2014 jyldyń mamyr aıynda Qazaqstannyń memlekettik shekarasyn zańsyz kesip ótkeni anyqtaldy.
Kórshi elde qylmysker esirtki men psıhotroptyq zattardy zańsyz ıemdengeni, saqtaǵany jáne tasymaldaǵany úshin izdeýde bolǵan.
Ustalǵan Reseı azamaty Nur-Sultan qalasynyń tergeý ızolıatoryna qamaldy.
QR memlekettik shekarasyn qasaqana zańsyz kesip ótý faktisi boıynsha qylmystyq is qozǵaldy.
Qazirgi ýaqytta sheteldiktiń QR aýmaǵynda qylmys jasaýǵa qatysy bar-joǵy tekserilýde.
Kóshi-qon protsesteriniń krımınogendik jaǵdaıǵa qolaısyz áser etý qaýpin azaıtý maqsatynda bıylǵy jyldyń 15-19 aqpan aralyǵynda Nur-Sultan qalasynyń polıtseıleri «Mıgrant» jedel-aldyn alý is-sharasyn ótkizgen bolatyn. Qala aýmaǵynda polıtsııa jasaqtary kúsheıtildi, ishki ister organdarynda ýaqytynda tirkelmegen zańsyz mıgranttar men tártip buzýshylardy anyqtaý reıdteriniń sany artty.
Jedel aldyn alý sharasynyń qorytyndysy boıynsha sheteldik azamattardyń Qazaqstan Respýblıkasynda júrip-turý erejesin buzǵany úshin 357 sheteldik azamat anyqtalyp, ákimshilik jaýapkershilikke tartyldy.
Sot sheshimimen 33 sheteldik elden shyǵaryldy.
Sheteldikterdi shaqyrǵan jáne olardyń belgilengen elde júrip-turý erejesin saqtaýyn qamtamasyz etpegen Qazaqstannyń 150 azamaty ákimshilik jaýapkershilikke tartyldy.
14 qylmysker ustaldy.
