Elordada bes aı ishinde 20 bala bıikten qulaǵan
NUR-SULTAN. QazAqparat – Jyl basynan beri elordada balalardyń joǵarydan qulaýy boıynsha 20 fakti tirkeldi. Bul týraly Nur-Sultan qalalyq №2 kópbeıindi balalar aýrýhanasynyń hırýrgııa qyzmetiniń jetekshisi Rınat Baıgereev málim etti, dep habarlaıdy QazAqparat tilshisi.
«Aýrýhanaǵa túsetin balalar arasynda jaraqat alý jaǵdaıy alǵashqy orynda. Ásirese balalardyń joǵarydan qulaý jaǵdaıy boıynsha ókinishke qaraı, elorda aldyńǵy qatarda. Qalada kópqabatty turǵyn úıler kóp. Bizdiń mamandar birneshe jyl boıy osy máselemen kúresip keledi. Oqys oqıǵanyń aldyn alý úshin úıdiń terezelerine arnaıy tor ornatylyp jatyr. Qala boıynsha balalardyń terezeden, joǵarydan qulap ketý faktisiniń 40-tan 60-qa deıingi jaǵdaıda sońy ólimmen aıaqtalady. Jyl basynan beri elordada balalardyń joǵarydan qulaý boıynsha 20 fakti tirkeldi», - dedi Rınat Baıgereev BAQ ókilderine arnalǵan baspasóz týry barysynda.
Onyń aıtýynsha, atalǵan balalar aýrýhanasynda jaraqat beketi jumys isteıdi. Ol bólimge kúnine túrli jaraqatpen 250-den astam bala kelip túsedi.
Sondaı-aq, maman keltirgen derekke sáıkes, kún saıyn 100-150 bala medıtsınalyq tekserýden ótedi.
«Qazir jansaqtaý bóliminde terezeden qulaǵan 2 bala jatyr. Mamandar tıisti medıtsınalyq kómekti kórsetýde», - deıdi atalǵan aýrýhananyń bas dárigeriniń orynbasary Medet Nuǵmanov tilshilerdiń suraǵyna jaýap bere turyp.
Buǵan deıin habarlaǵanymyzdaı atalǵan aýrýhanada alǵash ret kapsýlanyń kómegimen asqazan-ishek joldaryna dıagnostıka jasaldy.
