Elordada belgili kúıshi Tuıaqberdi Shámelovtyń shyǵarmashylyq keshi ótedi

Kúı óneriniń sheberi T.Shámelov Batys Qazaqstan oblysynyń Orda aýdanyna qarasty Saraljyn aýylynda dúnıege kelgen. Almaty mýzykalyq ýchılışesin, Almaty memlekettik konservatorııasyn bitirgen. Dombyrashy, Qazaqstan halyq ártisi Qalı Jantileýov syndy sańlaqtardan kúı óneriniń qyr-syryn meńgergen. Qurmanǵazy atyndaǵy orkestrde qyryq jyldan astam ýaqyt boıy qyzmet etip, qatardaǵy dombyrashydan bas kontsertmeıster, kórkemdik jetekshi dárejesine deıin kóterildi. Orkestr quramynda álemniń kóptegen elderinde óner kórsetti. Jeke oryndaýshy retinde Frantsııa, Qytaı, Aýǵanstan syndy shet elderde bolyp, qazaq eliniń ónerin álem jurtshylyǵyna tanystyrdy. Birneshe kúıi kúıtabaqqa jazylǵan. Onyń Qadyr Myrza Álıdiń «Dombyra», A.Asylbekovtiń «Aýylymdy saǵyndym» sózine shyǵarǵan ánderi respýblıkalyq konkýrstarda júldeli oryn aldy.