Elordada «Baıqońyr barysy» ashyq týrnıriniń jeńimpazdary anyqtaldy

ASTANA. QazAqparat – Búgin elordada Baıqońyr aýdany ákimdiginiń uıymdastyrýymen qazaq kúresinen jyl saıynǵy «Baıqońyr barysy» ashyq týrnıri ótti, dep habarlaıdy QazAqparat tilshisi.

Bas shahardaǵy «Óndiris» dene shynyqtyrý jáne saýyqtyrý kesheninde ótken saıysqa 75 boz kilem sheberi qatysty. Olar «Baıqońyr barysy» bas júldesinen bólek, 60 jáne 82 keli salmaq dárejesinde ózara baq synasty.

«Bıylǵy jylǵy týrnır Respýblıka kúni ulttyq merekesin atap ótý aıasynda uıymdastyryldy. Basty maqsaty – qazaq kúresin jastarǵa nasıhattaý, el turǵyndarynyń patrıottyq sezimin oıatý, ulttyq sport túrin jasóspirim urpaqtyń sanasyna sińirý. Bıylǵy jylǵy erekshelik – bas báıge «Baıqońyr barysynan» tys, 60 jáne 82 keli salmaqtaǵy palýandar da boz kilemde beldesti», - dedi Astana qalasy «Baıqońyr» aýdany ákimdiginiń baspasóz hatshysy Úkilim Saıatqyzy.

Jyl saıynǵy dástúrli týrnırdiń basty júldesi – «Baıqońyr barysy» ataǵy úshin elordalyq 21 sportshy boz kilemge shyqty. Nátıjesinde túıe palýan, «Baıqońyr barysy» júldesin Oljas Shynkeev jeńip aldy. Al, 2-oryn Nurdáýlet Aısaǵalıevke buıyrsa, 3-orynnan Meıirjan Slamshaıkov kórindi.

«Jarys óte joǵary deńgeıde ótti. Palýandardyń barlyǵy epti, kásibı daıyndyqpen kelgen. «Baıqońyr barysynyń» Respýblıka kúni, ózimizdiń ulttyq mereke qarsańynda ótip jatqany barlyǵymyzdy qýantyp otyr. Bul saıysqa 80-ge jýyq palýan qatysty. Buıyryp, úshinshi orynnan kórindim. Barlyq sportshylarǵa, uıymdastyrýshylarǵa alǵysymdy aıtamyn. Ásirese, búgingi jarysta jastar kóp. Osyndaı saıystardyń arqasynda óskeleń urpaqtyń sportqa degen qyzyýshylyǵy arta túsedi dep oılaımyn», - dep saıys týraly oıymen bólisti jarystyń júldegeri Saǵyndyq Áshim.

Týrnır qorytyndysy boıynsha, 60 keli salmaq dárejesinde 1-oryndy Nurbol Elýbaı qanjyǵasyna baılady. Al, 2-oryndy Erjan Erenkaıpov jeńip alsa, Saǵyndyq Áshim tuǵyrda 3-orynnan kórindi. Sonymen qatar, 82 keli salmaq dárejesi boıynsha 1-oryn Mádı Amangeldige buıyrsa, 2-oryndy Dıas Talǵatuly ıelendi. Bul salmaq dárejesinde synǵa túsken elordalyq Tımýr Ábýtaı 3-orynǵa turaqtady.

Aıta keteıik, jarysqa Qazaqstannyń eńbek sińirgen sport qaıratkerleri, ataqty palýandar men elimizdiń beldi tulǵalary da qatysty.