Elordada «Batys Eýropa - Batys Qytaı» jobasyn júzege asyrý máselesi boıynsha semınar-keńes ótti

Keńeske mınıstrliktiń qurylymdyq jáne aımaqtyq bólimsheleriniń jetekshileri men Almaty, Jambyl, Ońtústik Qazaqstan, Qyzylorda, Aqtóbe jáne Mańǵystaý oblystary ákimderiniń orynbasarlary, jol-qurylys materıaldaryn jetkizýshiler, avto jáne temirjol tasymaldaýshylary, merdigerlik kásiporyndar men tehnologııalyq qadaǵalaý qyzmetiniń basshylary qatysty.

Alqaly jıyndy ashqan Á.Qusaıynov kólik salasynyń 2010 jylǵa arnalǵan negizgi mindetteriniń biri «Batys Eýropa - Batys Qytaı» kólik dáliziniń, «Qorǵas - Jetigen» jáne «Ózen - Túrikmenstan shekarasy» 2 temirjol jelisiniń qurylysy boıynsha jumystarynyń, sonymen qatar «Batys Eýropa - Batys Qytaı» jobasynyń quramyna kiretin «Almaty - Qorǵas» jáne «Tashkent - Shymkent - Jambyl oblysy shekarasy» avtojol salasynyń kontsessııalyq jobalarynyń is júzinde júzege asyrylýynyń bastalatynyn atap ótti.

Onyń aıtýynsha, atalǵan barlyq jobalardyń jalpy quny 965,3 mlrd. teńgeni qurap, 2013 jylǵa deıin 439 shaqyrym jańa temirjoldar salynyp, «Batys Eýropa - Batys Qytaı» dáliziniń birinshi jáne ekinshi tehnıkalyq kategorııa ólshemderi boıynsha 2374 shaqyrymy qaıta salynady.

Jobany júzege asyrýǵa baılanysty máselelerdi rettep, tez arada sheshý úshin Premer-Mınıstrdiń ókimimen 6 kóshpeli shtab quryldy. Árbir shtab boıynsha tıisti oblystyń ákimimen kelisilgen shtabtyń jeke quramy belgilendi. Budan buryn iske asyrylǵan jobalardyń tájirıbesine súıene otyryp, talqyǵa salynatyn jáne sheshim qabyldaýdy qajet etetin ózekti máseleler tizimi jasaldy.

Shara barysynda jumystardy durys uıymdastyrý, jumyldyrýdy der kezinde ótkizý, qajetti materıaldardy jetkizý men kadr tapshylyǵy máselesin sheshý, sonymen qatar bekitilgen kestege sáıkes barlyq jol aralyqta nysandardy sapaly jáne ýaqytyly tapsyrýdy qamtamasyz etý máseleleri talqylandy.

Keńeste kólik jáne kommýnıkatsııa vıtse-mınıstri Dýlat Kóterbekov, «Qazaqstan temir joly» UK» AQ vıtse-prezıdenti Erik Sultanov, Qyzylorda oblysy ákiminiń orynbasary Madııar Aldońǵarov, sonymen qatar ınjenerlik qyzmet merdigerleri sóz sóıledi.

Keńesti qorytyndylaǵan vedomstvo basshysy Á.Qusaıynov taıaýdaǵy 2-3 jylda birlesken qarbalas jumystar bolatynyn atap ótti.