Elordada basseınnen 21 jastaǵy qyzdyń múrdesi tabyldy
NUR-SULTAN. QazAqparat - Elordadaǵy sport keshenderi biriniń basseıninde 21 jastaǵy qyzdyń máıiti tabyldy, dep habarlaıdy QazAqparat tilshisi.
«Osy jyldyń 16 qańtarynda saǵat 10-18-de polıtsııanyń kezekshi bólimine elordadaǵy sport kesheniniń basseıninde qyz múrdesi tabylǵany týraly habarlama tústi. Oqıǵa ornyna jetken jedel tergeý toby aqparatty rastady», - dedi Nur-Sultan qalalyq polıtsııa departamentiniń baspasóz qyzmetinen.
Qazirgi ýaqytta atalǵan sport kesheni jattyqtyrýshysynyń basseınde qyzdyń qozǵalyssyz jatqanyn baıqaǵany anyqtalyp otyr. Jattyqtyrýshy qyzdy sýdan shyǵaryp, jasandy tynys aldyryp, júregine masaj jasaǵan. Oqıǵa ornyna kelgen jedel járdem dárigerleri 21 jastaǵy qyzdyń qaıtys bolǵanyn anyqtaǵan.
«Qaıǵyly oqıǵa kezinde basseınde taǵy 4 adam bolǵan. Qaza bolǵan qyz basseınge birrettik abonement satyp alyp kelgen. Atalǵan fakti boıynsha tekserý júrgizilip jatyr», - dedi vedomstvodan.
