Elordada basqa adamnyń jeńildigi bar kólik kartasyn paıdalanatyndar kóbeıip ketti
NUR-SULTAN. QazAqparat – Elordada Kóliktik baqylaý departamentiniń qyzmetkerleri basqa bireýdiń jeńildigi bar kólik kartasyna óz sýretin jabystyryp alyp paıdalanǵan birneshe adamdy anyqtady, dep habarlaıdy QazAqparat tilshisi Astana LRT kompanııasyna silteme jasap.
«Negizinde jeńildigi bar kólik kartalary ataýly bolyp sanalady jáne úshinshi tulǵalarǵa berilmeıdi. Basqa adamnyń ataýly kólik kartasymen valıdatsııa jasaǵan jolaýshy tekserý kezinde jol aqysyn tólemegen dep sanalady», - dep jazdy kompanııanyń baspasóz qyzmeti Facebook-tegi paraqshasynda.
QR Ákimshilik quqyq buzýshylyq týraly kodeksine sáıkes jolaqysyn tóleýden jaltarǵany úshin 2 AEK, ıaǵnı 5050 teńge aıyppul salynady.
Ótken jyly elordanyń birneshe turǵyny QR Qylmystyq kodeksiniń 385-baby boıynsha jalǵan zeınetaqy kýálikterin paıdalanǵany úshin sottaldy.
«Osy bapqa sáıkes jalǵan qujatty paıdalanǵandyǵy úshin 300 aılyq eseptik kórsetkishke deıingi mólsherde aıyppul salýǵa, ne sol mólsherde túzeý jumystaryna, ne 240 saǵatqa deıingi merzimge qoǵamdyq jumystarǵa tartýǵa, ne 75 táýlikke deıingi merzimge qamaqqa alýǵa sııaqty jazalar qoldanylady», - delingen habarlamada.
