Elordada bank tonamaq bolǵan kúdiktiler ustaldy
NUR-SULTAN. QazAqparat – Tún ishinde elordadaǵy bankterdiń biriniń ǵımaratyna esik syndyryp kirgen eki kúdikti ustaldy, dep habarlaıdy QazAqparat tilshisi.
Qalalyq polıtsııa departamentiniń málimetinshe, túngi saǵat 02:30-da ishimdikke elitken 2 jigit shyny terezeni syndyryp, bank ǵımaratyna kirgen. Alaıda qaskúnemder kúzet dabylynyń iske qosylýyna baılanysty kózdegen maqsattaryna jete almady. Qylmys jasalǵan jerge kúzet kásiporyndarynyń qyzmetkerleri de jedel jetken.
«21 jáne 23 jastaǵy eki kúdikti «izi sýymaı» qolǵa tústi. Dámhanadan ishimdik iship shyqqan jigitter jeńil jolmen baıýdy kózdegen. Atalǵan fakti boıynsha qylmystyq is qozǵaldy. Nur-Sultan qalalyq polıtsııa departamenti kúzet dabylyn qoıýǵa jáne ǵımaratyn ishin beınekameralarmen jabdyqtaýǵa keńes beredi», - dedi vedomstvodan.
