Elordada balmuzdaq pen sút ónimderi tegin úlestiriledi
TÚRKІSTAN. QazAqparat - Búgin Túrkistan oblysynda óndirilgen aýylsharýashylyq salasyndaǵy alǵashqy ónimder Nur-Sultan qalasyna jóneltildi. Jolǵa shyqqan júk kólikterine jalpy quny 116 mln. teńgeni quraıtyn 365 tonna ónimderi tıelgen, dep habarlaıdy QazAqparat tilshisi.
Oblystyq aýylsharýashylyq basqarmasynyń basshysy Nurbek Badyraqovtyń aıtýynsha, azyq-túlikter men kókónister elordalyq turǵyndar men qonaqtarǵa bazar narqynan 10-15 paıyzǵa arzan saýdalanatyn bolady.
«Nur-Sultan qalasyn qaýipsiz azyq-túlikpen qamtamasyz etý jónindegi 2018-2020 jyldarǵa arnalǵan jol kartasy aıasynda Túrkistan oblysy ákimdiginiń uıymdastyrýymen maýsym aıynyń 1-2 kúnderi aýyl sharýashylyǵy ónimderiniń jármeńkesi ótkiziledi. Óńirimizde ótken jyldarmen salystyrǵanda kóktemgi dala jumystary 1 apta merzimge erte bastaldy. Nátıjesinde qazir 250 myń tonna kókónis, 22 myń tonna kartop, 1500 tonnaǵa jýyq jemis-jıdek ónimderi óndirildi», - dedi Nurbek Badyraqov.
Atalǵan shara aıasynda sondaı-aq túrkistandyq kásipkerler 16 jasqa deıingi balalarǵa tabıǵı taza balmuzdaq pen sút ónimderin tegin úlestiretin bolady. Igi is 1 maýsym «Halyqaralyq balalardy qorǵaý» kúnine oraı uıymdastyrylady. Al, jyl sońyna deıin Túrkistan oblysynan dál osyndaı aýylsharýashylyq taýarlarynyń kerýeni taǵy 4 ret jolǵa shyǵady dep josparlanyp otyr.
Aıta keteıik, oblysta aýylsharýashylyq salasyndaǵy eńbek ónimdiligin 2,5 esege arttyrý maqsatynda ınvestıtsııalyq jobalardy iske asyrýǵa basymdyq berilip otyr. Máselen, bıyldyń ózinde atalǵan salada aldyńǵy qatarly tehnologııalardy qoldana otyryp jáne halyqty jumyspen qamtý baǵytynda jalpy quny 89 mlrd. teńge bolatyn 480 jobany júzege asyrý kózdelgen. Jospar oryndalsa, 4620 jańa jumys oryndary ashylatyn bolady. Qazirdiń ózinde 130 jobasy júzege asyryldy. Sonymen qatar, búginde egis alqaptarynan jylyna 2-3 ónim alý máselesi de nazarǵa alynǵan. Osy baǵytta 69 joba qolǵa alynyp, oń nátıjege qol jetkizilgen.
