Elordada balany 1-shi synypqa qabyldaý tártibi jarııalandy
NUR-SULTAN. QazAqparat – Nur-Sultan qalasynyń bilim basqarmasynyń basshysy Sholpan Qadyrova jańa oqý jylynda 1-shi synypqa qabyldaý, mektepten mektepke, synyptan synypqa aýystyrý máselesi qalaı retteletinin aıtyp berdi, dep habarlaıdy QazAqparat tilshisi.
«Balalardy birinshi synypqa qabyldaý, mektepten mektepke, synyptan synypqa aýystyrý qyzmeti EGOV.kz elektrondyq úkimet portaly arqyly avtomattandyrylǵan. Ata-analar portaldyń «Bilim berý» bóliminde «Orta bilim berý» bólimin tańdaý arqyly kirip, ótinish berip, qajetti qujattardy tirkeıdi. Qujat tapsyrý merzimi – 15 mınýt. Memlekettik qyzmet kórsetý nysany – elektrondy. Ata-ananyń jeke kabınetine balany qabyldaǵan nemese qabyldamaǵany sebebi týraly habarlama keledi», - dedi Sholpan Qadyrova Nur-Sultan qalasy ákimdiginiń Facebook paraqshasynda onlaın rejımde ótken baspasóz máslıhatynda.
Birinshi synypqa balalardy qabyldaý úshin qujattar tizimin tolyq ótkizý qajet. Olar: balanyń ata-anasynan (zańdy ókilderinen) ótinish (erkin túrde), balanyń týý týraly kýáliginiń kóshirmesi, bala densaýlyǵy pasporty (026/ý-3 forma, 063/ý nysan boıynsha densaýlyq jaǵdaıy týraly qujat), 3x4 kólemindegi foto.
«Erekshe bilim berý qajettigi bar balalardy bilim berý uıymdaryna oqýǵa qabyldaý úshin portalǵa qosymsha pedagogıkalyq-medıtsınalyq-psıhologııalyq komıssııanyń qorytyndysy elektrondy túrde (skanversııa, foto) zańdy ókilderdiń kelisimimen usynylady. Sizderdiń nazarlaryńyzǵa taǵy bir ret atap ótkim keledi: mekteptiń qabyldaý komıssııasy oqýǵa ótinish bergen kezde basqa qosymsha qujattardy talap etpeýi tıis. Qujattardy qabyldaý 2020 jyldyń 1 maýsymynan bastalady. Jańa oqý jylyna daıyndyq maqsatynda 17 tamyzdan bastap mektepterde ata-analardyń qalaýy boıynsha aqysyz negizde jazǵy mektep jumysyn ótkizý josparlanýda», - dedi ol.
Kez-kelgen ózgerister týraly aqparat resmı saıtta jáne áleýmettik jelilerde habarlanady.
