Elordada balalarǵa arnalǵan jańa oıyn alańy men skeıt-saıabaq ashyldy

ASTANA. KAZINFORM - Astana qalasyndaǵy Y.Dúkenuly kóshesi men Respýblıka dańǵylynyń qıylysynda ornalasqan jańa balalar oıyn alańy men skeıt-saıabaq qala turǵyndarynyń úlken qýanyshyna aınaldy, dep habarlady elorda ákimdiginiń resmı saıty. 

Qoǵamdyq keńistikte boı kótergen bul nysan – tek oıyn alańy ǵana emes, balalardyń bos ýaqytyn tıimdi ótkizýine arnalǵan jarqyn, qaýipsiz jáne zamanaýı ortanyń úlgisi. 

Alańda skeıt-saıabaq pen túrli oıyn keshenderimen qatar, balalar men eresekterdiń dene shynyqtyrýyn damytatyn sporttyq qurylǵylar da ornatylǵan. Bul – salaýatty ómir saltyn bala jastan qalyptastyrý men qala turǵyndary arasynda keńinen nasıhattaýǵa baǵyttalǵan naqty qadam.

Aýdan turǵyny Sársenbaı Ábil rızashylyǵyn jetkizdi. 

– Balalarǵa arnalǵan jańa oıyn alańy – kózdiń jaýyn alatyn kórkem týyndyǵa aınalypty. Buǵan deıin de bul jerde oıyn alańy bolǵan desek te, dál osyndaı tartymdy, zamanaýı keıipke enbegen edi. Qala jáne aýdan ákimdikterine zor alǵysymyzdy bildiremiz. Jóndeý jumystaryn joǵary deńgeıde uıymdastyryp, balalarǵa qýanysh syılaǵandaryńyz – shynaıy janashyrlyqtyń kórinisi. Mundaı ıgi is – óskeleń urpaqqa degen qamqorlyqtyń naqty belgisi dep bilemiz. Barsha jaýapty mekemege myń alǵys, - dedi.

Munda balalardy jaraqattan qorǵaıtyn qaýipsiz jumsaq tósenish tóselip, keń zamanaýı skeıt alańy ornatylǵan. Júgiretin arnaıy jol jasalǵan. Sporttyq trenajerlar qoıylǵan. Syrǵanaqtar kesheni de qarastyrylǵan. Kóleńke berip turǵan aǵashtar otyrǵyzylǵan. Tynyǵyp demalý úshin kóshe oryndyqtary da barynsha qolaıly etip jasalǵan.

Jalpy, bıyl qala boıynsha 180-nen astam aýla men qoǵamdyq keńistikti abattandyrý josparlanyp otyr. 

Eske sala keteıik, buǵan deıin Qonaev qalasynda jańa saıabaq salynatynyn habarlaǵan edik.