Elordada balalardyń patrıottyq ánder festıvali ótedi
NUR-SULTAN. QazAqparat - 10 qarasha kúni Qazaqstan halqy Assambleıasy Nur-Sultan qalasy hatshylyǵy «Jastar jyly» aıasynda L.Gýmılev atyndaǵy EUÝ-de «Altyn kún» atty balalardyń II patrıottyq ánder festıvalin uıymdastyrady, dep habarlaıdy QazAqparat Elorda ınfoǵa silteme jasap.
Festıval tárbıe men azamattyq qasıetterdi damytýǵa, daryndy balalardy anyqtaýǵa jáne qoldaýǵa, olardyń shyǵarmashylyq qabiletterin iske asyrýǵa, sondaı-aq patrıottyq án janryn nasıhattaýǵa yqpal etý maqsatynda ótedi.
Balalar festıvali baǵdarlamasynda Otan, elorda, týǵan jer týraly ánder shyrqalatyn bolady.
Festıvalge etnomádenı birlestikterdiń kórkemónerpazdar ujymy, jalpy bilim berý mekemelerindegi oqýshylar, ansamblder, sondaı-aq 6-16 jas aralyǵyndaǵy jasóspirimder qatysady.
Qazylar alqasy balalar baıqaýyn úsh atalym boıynsha, ıaǵnı 6 jastan 10 jasqa deıingi «Úzdik oryndaýshy», 10 jastan 13 jasqa deıingi «Úzdik oryndaýshy», 14 jastan 16 jasqa deıingi «Úzdik oryndaýshy» atalymdary boıynsha baǵalaıdy.
