Elordada balalardyń 60 paıyzy úıirmelerge barady
ASTANA. QazAqparat - Astanada sporttyq-mádenı úıirmelerge qaraǵanda ǵylymı-tehnıkalyq úıirmelerge barý deńgeıi 2 ese kem.
Búgin elordadaǵy Tamyz keńesinde qalalyq bilim basqarmasynyń basshysy Elmıra Sýhanberdıeva osylaı aıtty.
Buǵan mysal retinde ol Oqýshylar saraıyndaǵy jaǵdaıdy keltirdi.
«Bul keremet nysandaǵy jumystar ǵylym, óner jáne sport baǵattarynda júrgiziledi. 100-den astam sektsııalar jumys isteıdi jáne oǵan 10 myńnan astam bala barady. Sporttyq-mádenı úıirmelerge qaraǵanda, ǵylymı-tehnıkalyq sektsııalarǵa oqýshylar eki ese az baratyndyǵyna pedagogıkalyq qoǵamnyń nazaryn aýdarǵym keledi»,-dedi ol.
Basqarma basshysynyń aıtýynsha, balalardyń tehnıkalyq baǵytqa qyzyǵýshylyǵyn erte jastan oıatý kerek.
Onyń sózine qaraǵanda, ótken jyly Astanada túrli úıirmeler men ortalyqtarda synyptan tys jumysqa tartylǵan oqýshylardyń sany 40 paıyzdan 60 paıyzǵa deıin artty.
