Elordada balalardy túsirip, kólikti aıdap ketken kúdikti ustaldy
NUR-SULTAN. QazAqparat - Elordanyń polıtsııa qyzmetkerleri kólikte otyrǵan 2 balany túsirip, avtomobıldi aıdap ketken kúdiktini kóp uzamaı qolǵa túsirdi. Bul jaıynda Nur-Sultan qalalyq polıtsııa departamentinen málim etti, dep habarlaıdy QazAqparat tilshisi.
Vedomstvo málimetinshe, 25 sáýir kúni saǵat 13-15-te elorda turǵyny salonynda 9 jáne 13 jastaǵy balalary otyrǵan kóligin saýda úıiniń turaǵyna qaldyryp, dúkenge kirgen. Osy sátte kólikke kelgen belgisiz adam balalardan salonnan túsýdi buıyryp, odan keıin avtomobıl rýline otyryp, belgisiz baǵytqa ketip qalǵan.
«Kólikti aıdap alyp ketken adamdy ustaý úshin polıtsııa departamenti «Tosqaýyl« josparyn iske qosyp, nátıjesinde qylmysker 7 mınýttyń ishinde ustady. Polıtsııa qyzmetkerleri atalǵan azamattyń kim ekendigin anyqtady. Ol - 50 jastaǵy elorda turǵyny, buǵan deıin qylmystyq jáne ákimshilik jaýapkershilikke tartylǵan. Qylmys jasaǵan sátte mas kúıde bolǵan», - dep atap ótilgen departament habarlamasynda.
Ustalǵan elordalyq Nur-Sultan qalalyq PD ýaqytsha oqshaýlaǵyshyna qamaldy. Atalǵan fakti boıynsha QR QK 200-baby boıynsha sotqa deıingi tergeý júrgizilip jatyr.
