Elordada balalardy qorǵaý jóninde tegin keńes berilýde
ASTANA. 1 maýsym. QazAqparat - Halyqaralyq balalar kúnine arnalǵan merekelik is-sharalar eki jerde ótkizilýde.
Biri - Mahambet Ótemisov atyndaǵy Oqýshylar saraıy bolsa, ekinshisi - jańa Oqýshylar saraıy. Shattyqqa bólengen balǵyndar ázirge oıynnyń qyzyǵyna túsip, baıqaýlar men kóńildi oıyndarǵa qatysyp jatqan kezde olardyń ata-analary balalardy qorǵaý máseleleri jóninde tegin keńes alý múmkindigi bar. Astana.kz saıtyna Bilim basqarmasynan málim etkenindeı, keńes berýdi qalanyń úkimettik emes uıymdary júzege asyrýda.
«Іs-sharaǵa qatysý úshin Astananyń otbasylyq tárbıe ınstıtýty, Daǵdarys ortalyǵy odaǵy, Qalalyq balalar quqyǵyn qorǵaý departamenti men basqa da uıymdar shaqyrylǵan. Olar jańa Oqýshylar saraıynda 11.00 alty-jeti ústel basynda balalar quqyǵyn qorǵaý máseleleri boıynsha keńes berip, aqparattyq býkletter men paraqshalar úlestiredi», - dep habarlaıdy basqarmadan.
Tájirıbe kórsetkendeı, bizdiń qalamyzdyń turǵyndaryna osy syndy keńesterdi ótkizip otyrý qajet-aq. Balalardyń quqyǵyn qorǵaý departamentiniń senim telefonyna aıyna 15 qońyraý kelip túsedi.
«Balabaqsha, mektep syndy bilim berý oryndarynda balalardyń quqyǵy buzylǵan jaǵdaıda ata-analar jıi shaǵymdanady. Ata- analardan aqsha jınaýǵa qatysty shaǵymdar da kóp túsedi. Sonymen qatar, balany qamqorlyqqa alý, ata- analary ajyrasqan jaǵdaıda balanyń turǵylyqty meken-jaıyn anyqtaý jónindegi suraqtar boıynsha habarlasady», - dep málim etti astana.kz saıtyna departamentten.
