Elordada balalardy kıberbýllıngten qorǵaıtyn mobıldi top jumysyn bastady
NUR-SULTAN. QazAqparat – Nur-Sultan qalalyq bilim basqarmasy balalardy kıberbýllıngten qorǵaıtyn mobıldi topty iske qosty, dep habarlaıdy QazAqparat tilshisi.
«Búgingi tańda, aqparattyq tehnologııalar ǵasyrynda, balalar kıberbýllıngi - bala psıhıkasyna jasalatyn joıqyn shabýyldyń biri. Kıberbýllıngtiń saldary kóbinese óte aýyr saldarǵa ákep soǵady. Ókinishke qaraı, balanyń psıhologııalyq shabýylǵa ushyraǵanyn eresekter árdaıym bilmeýi de, jiti nazar aýdarmaýy da múmkin», - dep habarlaıdy basqarmadan.
Osy rette balanyń psıhologııalyq ózin-ózi tanýyn damytý jáne olarǵa der kezinde kómek kórsetý úshin birqatar shara qabyldanbaq. Naqtyraq aıtqanda qıyn jaǵdaıdaǵy balalarǵa der kezinde kómek kórsetý úshin alǵash ret memlekettik áleýmettik tapsyrys aıasynda «Pravo» qoǵamdyq qorymen birlese otyryp, mobıldi kómek toby jumysyn bastady. Mobıldi top kıberbýllıngpen betpe-bet kelgenderge ǵana emes, qıyn jaǵdaıda qalǵan barlyq balaǵa kómektesedi.
«Bıyl alǵash ret biz táýlik boıy jumys isteıtin jáne qıyn jaǵdaıdaǵy balalarǵa kómektesetin daıyn mobıldi toptyń jumysyn qarastyrdyq. Olar zardap shekken balalardyń úıine táýliktiń qaı ýaqyty bolmasyn baryp, tıisti kómek kórsete alady», - delingen habarlamada.
Sonymen qatar balanyń qorǵalýyn qamtamasyz etý úshin elordada «balalar qonaq úıi» (Nur-Sultan, Abaı dańǵyly, 92/3) táýlik boıy jumys isteıdi. Ata-analar men balalar táýlik boıy jumys isteıtin «1409» senim telefony arqyly da kómek ala alady. Bilim basqarmasynyń psıhologııalyq qyzmetiniń telefony - 20-25-40, 8 707 477 79 08. Kámeletke tolmaǵandardyń quqyqtaryn qorǵaý bólimine habarlasý úshin 55-69-60, 55-68-67, 55-01-79 nómirine qońyraý shalýǵa bolady.
Aıta ketsek kıberbýllıng – qazirgi kommýnıkatsııalardy, ınternetti paıdalana otyryp, qoldanýshyny qorqytý úshin jasalatyn shabýyl. Naqtyraq aıtqanda bul shabýyldy jasaıtyndar áleýmettik jeli nemese elektrondy poshta arqyly úreıli nemese ádepten tys materıal nemese habarlama jiberip, adamdardy qorqytýy múmkin. «Trolder» nemese «mobberler» dep atalatyn ınternetti qoldanýshylar mundaı qylmysty aty-jónin kórsetpeı jasaıdy.
