Elordada balalar-jasóspirimder sport mektepterine qabyldaý bastaldy
ASTANA. 28 tamyz. QazAqparat - Astanada 25 tamyzdan bastap qalalyq balalar-jasóspirimder sport mektepterinde bastapqy daıyndyq toptaryna balalardy qabyldaý bastaldy. Bul týraly astana.kz saıtyna Týrızm, dene shynyqtyrý jáne sport basqarmasynan habarlady.
«Jalpy sporttyń 55 túri boıynsha 10 balalar-jasóspirimder mektebinde jáne mamandandyrylǵan olımpıadalyq rezerv balalar-jasóspirimder sport mektebinde qabyldaý júrgizilýde», - dep habarlady vedomstvo.
«Balalar sport mektepteriniń qyzmetin uıymdastyrý tártibiniń erejesin jáne olımpıadalyq rezerv mamandandyrylǵan balalar-jasóspirimder mektebiniń qyzmetin uıymdastyrý qaǵıdalaryn bekitý týraly» QR Sport jáne dene shynyqtyrý agenttiginiń buıryǵyna sáıkes, bastapqy daıyndyq tobyna qabyldaý úshin bala kem degende 6 jasta bolýy tıis. Jeke sport túriniń erekshelikteri men qyr-syryna baılanysty jas mólsheri ózgeredi.
Sport sektsııalaryna qabyldaý 25 qyrkúıekke deıin jalǵasady.
