Elordada balalar úıinen 25,9 mıllıon teńge jymqyrǵan
NUR-SULTAN. QazAqparat – QR Qarjylyq monıtorıng agenttigi balalar úıinen 25,9 mıllıon teńgeni jymqyrý deregin anyqtady, dep habarlaıdy QazAqparat agentiktiń baspasóz qyzmetine silteme jasap.
Baspasóz qyzmetiniń habarlaýynsha, jetim jáne ata-anasynyń qamqorlyǵynsyz qalǵan balalardyń barlyq quqyqtaryn qorǵaý jáne qarjylyq qamtamasyz etý árqashan Qarjylyq monıtorıng agenttiginiń basty nazarynda.
Qazirgi ýaqytta «Qamqor» jedel aldyn alý is-sharasy aıasynda agenttik elordalyq balalar úıleriniń birinde jetim balalarǵa azyq-túlik satyp alýǵa bólingen bıýdjet qarajatyn jymqyrý deregi boıynsha sotqa deıingi tergeýdi bastady.
Tergeý osy mekemeniń dırektory men bas býhgalteri satyp alý erejelerimen qarastyrylǵan protsedýralardy ótkizbeı, basqarýyndaǵy úlestes kásiporynmen azyq-túlik jetkizýge sharttar jasaǵandyǵyn anyqtady. Bul rette, kompanııanyń naqty ıesi bas býhgalterdiń burynǵy jubaıy bolyp tabylady.
2019-2020 jyldar kezeńinde jasalǵan sharttar boıynsha laýazymdy tulǵalar atalǵan kompanııa arqyly bólingen 130 mln. teńge bıýdjet qarajatynan jetim balalarǵa azyq-túlik satyp alýǵa bólingen 25,9 mıllıon teńgeni jymqyrǵan.
«Tergeý jalǵasýda. Ózge aqparat tergeý múddesine oraı jarııa etýge jatpaıdy»,-delingen habarlamada.
