Elordada balalar úıinde tárbıelenýshiler sany azaıyp keledi

ASTANA. QazAqparat – Elordada balalar úıinde tárbıelenýshiler sany azaıyp keledi. Qasymhan Senǵazyevtiń aıtýynsha, bul jaǵymdy tendentsııaǵa áleýmettik jobalar tikeleı áser etip otyr, dep habarlaıdy QazAqparat tilshisi.

«Búginde elordada jetim jáne ata-anasynyń qamqorlyǵynsyz qalǵan 860 bala bar. 170 bala uıymdarda, 690 bala patronattyq otbasynda tárbıelenýde.

Ótken jylmen salystyrǵanda mekemelerdegi balalar sany 3,4% (169 bala) azaıyp, 89 bala otbasyna ornalastyryldy», - dedi ol óńirlik kommýnıkatsııalar qyzmetinde ótken brıfıngide.

Onyń sózinshe, «Úıdegideı» jobasynyń aıasynda 59 bala týǵan otbasynda qalǵan.

Al balalar jyly aıasynda iske qosylǵan «Psıhologııalyq qoldaý qyzmeti» jobasynyń aıasynda 205 otbasy zańgerlerden, áleýmettik qyzmetkerlerden, psıhologtardan keńes alǵan.

«Bul jobalardy júzege asyrý kelesi jyldary da jalǵasyn tabady, bul uıymdardaǵy oqýshylar sanyn qysqartýǵa jáne áleýmettik jaǵdaıy tómen ata-analardy áleýmettendirýge múmkindik beredi», - dedi basqarma basshysy.