Elordada balalar shyǵarmashylyǵynyń alǵashqy ınklıýzıvtik festıvali ótýde
ASTANA. 14 aqpan. QazAqparat - Búgin elordada balalar shyǵarmashylyǵynyń alǵashqy ınklıýzıvtik «Ózgerister jeli» festıvali ótýde. Atalǵan festıvaldiń biregeıligi sonda - ol deni saý balalar men múmkindigi shekteýli balalar shyǵarmashylyǵyn biriktiredi.
Elordanyń resmı saıtynyń jazýynsha, is-sharaǵa balabaqshalardan, jalpy bilim beretin mektepterden, respýblıkanyń túrli qalalaryndaǵy mamandandyrylǵan ınternattar men ońaltý ortalyqtarynan barlyǵy 380 bala qatysýda. Uıymdastyrýshysy - «OkeanArt» art-terapııa shyǵarmashylyq ortalyǵy.
Ortalyqtyń bas dırektory Gúlmıra Tatenovanyń aıtýynsha, festıvaldi ótkizýdegi negizgi maqsat - múmkindigi shekteýli balalar men olardyń qatarlastaryn biriktiretin ınklıýzıvtik shyǵarmashylyq keńistik qalyptastyrý. Bul olardyń shyǵarmashylyq qarym-qabiletterin jetildirip, qoǵamda óz betinshe ómir súrýge daıyndaıtyn múmkindikter bolýy qajet.
«Inklıýzıv - bul tek naýqas balalardyń deni saý balalar oqıtyn mektepte oqýy emes, ol túrli áleýmettik toptaǵy tili, mádenıeti, tanymy bólek jandardyń belgili bir ortada ortaq til taýyp, ózara aralasýy.
Bizdiń búgingi is-sharanyń negizgi ıdeıasy - bul adamdar arasyndaǵy ózara qarym-qatynasty, olardyń bir-birine kerektigin jáne bir-birine degen qyzyǵýshylyǵy artqandyǵyn kórsetý», - dedi ol.
Festıvaldiń kontserttik baǵdarlamasy da aýqymdy. Oǵan vokaldyq, horeografııalyq nómirler, ádebı shyǵarma, shaǵyn teatrlyq qoıylym, tipti mıýzıkl úzindileri engizilipti.
Uıymdastyrýshylar habarlaǵanyndaı, festıval sońynda óner kórsetken barlyq qatysýshylarǵa birdeı syılyqtar men dıplomdar beriledi. «Munda balalar tek baıqaý úshin ǵana kelgen joq, jeńiske jetý úshin, bir-birimen aralasyp, kóńil kóterý úshin keldi ǵoı. Sondyqtan biz osy merekede balalar barynsha shattyqqa bólensin dep sheshtik», - deıdi olar.
