Elordada balalar men jasóspirimderdiń alǵashqy Kazakhstan Kids Forum 2016 forýmy ótti
ASTANA. QazAqparat - Haileybury Astana mektebinde qazaqstandyq balalar men jasóspirimderdiń alǵashqy Kazakhstan Kids Forum 2016 forýmy men kórmesi ótti, dep habarlaıdy elorda ákimdiginiń baspasóz qyzmeti.
Kazakhstan Kids Forum 2016 Dúnıejúzilik sýıtsıdke qarsy kúres kúnine jáne Qazaqstandaǵy Otbasy kúnine oraılastyryldy. Forýmnyń basty taqyryptary baqytty bala psıhologııasy máseleleri, balalardy erte damytý ádistemeleri, sondaı-aq, jasóspirimderdiń daǵdarys kezeńin eńserý joldary boldy.
Forýmnyń mıssııasy balalardy adamgershilikke tárbıeleý salasyndaǵy ozyq praktıkalardy talqylaýǵa, sonymen qatar, ashyq dıalog pen ámbebap jáne dástúrli qundylyqtardy saqtaý boıynsha pikir almasý úshin pikirtalas alańymen qamtamasyz etý bolyp tabylady. Forým barysynda jasóspirimder tabysqa jetken qurdastarymen, tanymal tulǵalarmen, sarapshylarmen jáne ata-analarmen túrli ózekti taqyryptar boıynsha suqbattasty.
Forým aıasynda ıÝNISEF-tiń balalardy damytýǵa arnalǵan baǵdarlamasy tanystyryldy. Nıet bildirgen jasóspirimder Public talk formatyndaǵy bıznes bilimnen trenıngke qatysty. Olar Qazaqstannyń tanymal jastarymen jáne basqa da qoǵam qaıratkerlerimen áńgimelesti.
«Jas daryndardy qoldaý baǵdarlamasy - granttar, stıpendııalar jáne qorǵaý men kótermeleýdiń basqa da nysandary» taqyrybynda ótken dóńgelek ústel barysynda qorlar men birlestikterdiń ókilderi balalar men jasóspirimderdi óz usynystarymen tanystyrdy, al tulǵaaralyq qarym-qatynas salasyndaǵy mamandardyń trenıngteri balalardyń jańa qyrlaryn pash etti.
Forýmda ata-analar balalardy tárbıeleýdiń ozyq tehnologııalarymen, bilim jáne oqytý baǵdarlamalarymen tanysty, balalardyń demalysyn uıymdastyrý boıynsha aqparat alyp, jasóspirimder keńistiginiń zamanaýı úrdisteri men táýekelderin sóz etti.
