Elordada balalar kólikten aqsha urlap, dostaryna tátti alyp bergen
NUR-SULTAN. QazAqparat – Elordada eki oqýshy bala avtokólikten sómke urlap, ishindegi aqshaǵa dostaryna tátti alyp bergen, dep habarlaıdy QazAqparat tilshisi.
Velosıped teýip júrgen balalar avtokóliktiń birinde áıelder sómkesi qalyp ketkenin baıqaǵan. Mańaıda eshkimniń joqtyǵyna kózi jetken olar kólik salonyna kirip, sómkeni jymqyryp ketken.
Mashınanyń esigi qulyptalmaǵany anyqtaldy.
«Balalar ishindegi aqshasyn alyp, sómkeniń ózin laqtyryp jibergen. Urlyqty kórgen áıel polıtsııaǵa júgindi. Birneshe saǵattyń ishinde quqyq qorǵaýshylar vıdeobaqylaý kameralary arqyly zań buzýshylardy ustap aldy. Polıtsııa qyzmetkerlerin kórgen olar isin birden moıyndap, keshirim surady. «Aqsha qaıda?» degen suraqqa balalar ózderine jáne kórshi dostaryna gazdalǵan sýsyn, chıps pen tátti-dámdi alýǵa jumsaǵanyn aıtty», - dedi qalalyq Polıtsııa departamentinen.
Jasóspirimder isteri jónindegi ınspektorlar balalar buǵan deıin mundaı zań buzýshylyqqa barmaǵanyn aıtady. Polıtseıler istiń saldaryn uqtyryp, oqýshylarmen túsindirý jumystaryn júrgizgen.
Al júrgizýshilerge tártip saqshylary kólikti jaýyp júrýge keńes beredi.
«Sonymen birge polıtsııa jyl basynan beri tekseris júrgizip, ashyq qalǵan 700 kólikti anyqtaǵan. Olardyń 600-i polıtsııanyń kózinshe esigin jaýyp, eskertilgen», - dep habarlaıdy departamentten.
