Elordada balalar qaýipsizdigi aılyǵy jarııalandy
Jıyn barysynda ákim orynbasary tıisti memlekettik organdarǵa beınebaqylaý kameralarynyń jumys jaǵdaıyn tekserý úshin qala mektepteri boıynsha birlesip tekserý jumystaryn júrgizýdi tapsyrdy.
«Elorda mektepterindegi qaýipsizdikti qamtamasyz etý úshin aldymen mektepterdegi beınebaqylaý kamerasy máselesin sheship alýymyz qajet. Ol úshin bizde eń aldymen statıstıka bolýy kerek. Qansha mektepte beınebaqylaý kamerasy bar, qaısysy jumys isteıdi, qaısysy jumys istemeıdi degen sekildi. Osy oraıda qalalyq bilim basqarmasy, mektep dırektorlary, polıtsııa departamenti jáne «iKOMEK» ortalyǵyna tapsyrma beremin. Qalanyń barlyq mektepterin aralap shyǵyp, qaýipsizdik máselesin, onyń ishinde beınebaqylaý kamerlarynyń jumys isteýi boıynsha monıtorıng júrgizińizder. Ol úshin komıssııa quryp, onyń quramyna tıisti organdardyń ókilderin kirgizip, jumys jasańyzdar. Atalǵan komıssııa qaladaǵy ár mektepti aralap kórip, beınebaqylaý kameralarynyń jumys isteý deńgeıin anyqtasyn. Sonda ǵana biz elorda mektepteriniń qaýipsizdik máselesi men neni birinshi sheshýimiz kerektigin bile alamyz», - dedi Baqtııar Máken.
Ákim orynbasary elordada balalar qaýipsizdigi aılyǵy ótkiziletinin habarlady. Odan bólek, B.Máken qaýipsizdikke jaýap beretin kúzet uıymdaryn tekserýdi tapsyrdy.
«Qazirgi kúni qalada túrli kúzet uıymdary kóbeıip ketti. Sany bar, sapasy joq. Bul da - kezek kúttirmeıtin másele. Kúzet kompanııalarynyń sanyn 3-4-ke deıin qysqartý kerek. Sonda qaýipsizdikke qatysty suraqtardy tek solarǵa qoıyp, solardan talap etetin bolamyz. Sebebi oqys oqıǵa oryn alsa, únemi kináli adamdy izdep júremiz. Sizderge bir apta ýaqyt beremin, bárin qarap shyǵyp, bizge jetkizińizder. Odan ári biz qala ákimimen oılasa kele máseleni túbegeıli sheshý joldaryn qarastyramyz», - dedi ákim orynbasary.
Atalǵan jıynǵa bilim basqarmasy, polıtsııa departamentiniń basshylyǵy, mektep dırektorlary men qalalyq ákimdik ókilderi qatysty.
