Elordada balabaqshalarǵa 3 myńǵa jýyq orynǵa qosymsha bilim berý tapsyrysy ornalastyrylady

NUR-SULTAN. QazAqparat – Bıyl 1 shildeden elordada jeke balabaqshalarǵa qosymsha memlekettik bilim berý tapsyrysy ornalastyrylady. Bul týraly Nur-Sultan qalalyq bilim basqarmasynyń basshysy Sholpan Qadyrova málim etti, dep habarlaıdy QazAqparat tilshisi.

«1 shildeden bastap jergilikti bıýdjetten jeke balabaqshalarǵa 2 856 oryndyq memlekettik bilim berý tapsyrysyn belgileý josparlanýda», - dedi Sh. Qadyrova onlaın baspasóz máslıhatynda.

Budan buryn habarlanǵandaı, QR Bilim jáne ǵylym mınıstri Ashat Aımaǵambetov bilim berý uıymdaryna qabyldaýǵa qujat tapsyrý jeńildetilgenin aıtty.0

«Bıyl biz balalardy balabaqshalarǵa qabyldaý erejelerine ózgerister engizdik. Endi ata-analar kezekke qoıý qyzmetin tek bilim berý bóliminiń keńsesi arqyly ǵana emes, sondaı-aq óz betimen «Azamattarǵa arnalǵan úkimet» bólimderi nemese «Elektrondyq úkimet» veb-portaly arqyly júzege asyra alady. Bul rette kóptegen qujattardy jan-jaqtan jınaý qajet bolmaıdy», - dedi mınıstr.