Astanada balabaqsha tapshylyǵy qalaı sheshilip jatyr

Elordada 60 balabaqsha salynady, onyń 10-y jobalanyp jatyr. Bul týraly Astana qalalyq bilim basqarmasynyń basshysy Qasymhan Senǵazıev aıtty, dep habarlaıdy Kazinform.

«Balalardy mektepke deıingi tárbıemen jáne oqytýmen qamtýdy ulǵaıtý maqsatynda 2023 jyldyń basynan 10 214 orynǵa memlekettik tapsyrys ornalastyryldy. Sonymen qatar kelesi jyly taǵy 10 myńnan astam orynǵa memlekettik tapsyrys ornalastyratyn bolamyz. Sondaı-aq balabaqshalardaǵy oryn tapshylyǵyn joıý maqsatynda 60 balabaqsha salý josparlanǵan. Búgingi kúni 10 balabaqshanyń jer telimderi belgilenip, jobalaý jumystary bastaldy», - dedi basqarmanyń basshysy.

Qasymhan Senǵazıevtiń dereginshe, jańa oqý jylynda alǵash ret mektepke deıingi bilim berý uıymdarynda tárbıelenip jatqan jekelegen sanattaǵy 10 250 balaǵa tegin tamaq berile bastady.

«Osy jyldyń qyrkúıek aıynda 4 balabaqshada emotsııalyq-erki jaǵynan jáne minez-qulqynda buzylystary bar balalarǵa arnalǵan ınklıýzııany qoldaý kabınetteri ashyldy. Sonymen birge jyl sońyna deıin 4 shaǵyn ınklıýzııany qoldaý kabınetteri ashylady. Jol kartasynyń tarmaqtaryn oryndaý barysynda, jergilikti bıýdjetten qoldaý taba otyryp, 54 balabaqshada shaǵyn sáýlet nysandary men oıyn alańdary jańartyldy. 2024 jyly qalǵan 43 balabaqshada jańartylady. 9 bilim berý uıymyna kúrdeli jóndeý júrgizildi. 2024 jyly 13 bilim berý uıymy kúrdeli jóndeýden ótedi», - dedi Bilim basqarmasynyń basshysy.

Q. Senǵazıev osy jyly balabaqshalardaǵy tárbıeshilerdiń kásibı deńgeıin arttyrý boıynsha aýqymdy jumystar atqarylǵanyna toqtaldy.

«360 pedagog qaıta daıarlaý kýrstarynan jáne 1 062 pedagog biliktiligin arttyrý kýrstarynnan ótti. Aldaǵy 2 jylda beıindi bilimi bar tárbıeshilerdiń úlesin 100 paıyzǵa jetkizetin bolamyz», - dedi ol.

Aıta keteıik, búgin Oqý-aǵartý mınıstri Ǵanı Beısembaev Astana jurtshylyǵymen kezdesý ótkizip jatyr.