Elordada balabaqsha qyzmetkeri týberkýlezge shaldyqqan bolyp shyqty
NUR-SULTAN. QazAqparat - Elordadaǵy qoǵamdyq densaýlyqty qorǵaý departamentiniń bastyǵy Sádýaqas Baıǵabylov Nur-Sultan qalasyndaǵy jeke menshik balabaqsha qyzmetkeriniń týberkýlezben aýyratynyna túsinikteme berdi, dep habarlaıdy QazAqparat vedomstvoǵa silteme jasap.
Bul fakt «Kınder» jekemenshik balabaqshasynyń qyzmetkeri 2019 jyldyń 14 naýryzynda medıtsınalyq mekemeniń qyzmetine júgingen kezde belgili bolǵan. Sol kúni-aq ol týberkýlezge qarsy dıspanserge jatqyzyldy.
Aıta keteıik, naýqas óziniń jumys ornyn jasyrǵan. Aldyn ala zertteý nátıjesinde naýqastyń Nur-Sultan qalasyndaǵy birde-bir medıtsınalyq mekemege tirkeýge turmaǵany anyqtaldy.
Óz kezeginde, «Kınder» jekemenshik balabaqshasynyń jetekshisi naýqas áıeldiń kir jýý qyzmetin atqarǵandyqtan, balalar men qyzmetkerlerden bólek jeke esikten kirip-shyǵyp júrgenin aıtty.
Alaıda, aǵymdaǵy jyldyń 4 sáýirinde týberkýlezdiń aldyn alý jónindegi departament mamandarynyń túsindirý jumystary kezinde ata-analar naýqastyń úlken jáne kishi toptarda kútýshi bolyp jumys istegenin aıtqan.
2019 jyldyń 5 sáýirinen bastap Máskeý kóshesi, 12/2 mekenjaıynda ornalasqan «Kınder» bala baqshasyn («J.S.Qusaıynova» JShS) jospardan tys tekserý bastaldy. Balabaqsha meńgerýshisin qosa alǵanda, barlyq qyzmetkerler qosymsha rentgendik tekserýden ótti, týberkýlez anyqtalmady. Balalar medıtsınalyq tekserýden ótip jatyr, aldyn ala derekter aýrýdyń belgileri joq ekenin kórsetti, dep habarlady QDSD.
«Alańdaýǵa esh sebep joq, balalar týǵannan bastap týberkýlezge qarsy ekpe alǵandyqtan, «Kınder» balabaqshasyndaǵy búldirshinderdiń densaýlyǵyna qaýip tóngen joq», - dedi Sádýaqas Baıǵabylov.
Tekserý qorytyndysy aıaqtalǵannan keıin qosymsha aqparat jarııalanady dedi vedomstvodan.
