Elordada «Bala - bizdiń bolashaǵymyz» atty aktsııa ótýde
ASTANA. 22 maýsym. QazAqparat - Búgin Astanadaǵy M. Ótemisuly atyndaǵy Oqýshylar saraıynda Saryarqa aýdany ákimdigi men prokýratýrasynyń uıymdastyrýymen «Bala - bizdiń bolashaǵymyz» atty is-shara ótti.
Sharanyń maqsaty jasóspirimder arasynda salaýatty ómir salty men sportty nasıhattaý bolyp tabylady.
«Atalǵan sharany ótkizý qazirdiń ózinde dástúrge aınalyp barady jáne bul Qazaqstannyń barlyq qalalarynda jyl saıyn ótkizilip keledi. Bundaı aktsııalar elordanyń barlyq aýdandarynda ákimdiktermen birlesip ótkizilýde», - deıdi Saryarqa aýdandyq prokýrorynyń orynbasary Erjan Marat.
Aktsııa sheńberinde bas qalanyń sport klýbtarynyń túlekteri kórinister qoıdy. Oqýshylar men sharaǵa qatysýshylar arasynda ulttyq sport túrlerinen, sporttyq oıyndardan jarystar ótkizildi. Arqan tartys, toǵyz qumalaq, asyq atý oıyndarynan saıystar ótti. Jeńimpazdar baǵaly syılyqtarmen marapattaldy.
