Elordada BAQ ókilderi arasynda voleıboldan týrnır ótti

NUR-SULTAN. QazAqparat - Sport sharasy 8 naýryz - Halyqaralyq áıelder kúnine oraılastyryldy, dep habarlaıdy QazAqparat.

QR Indýstrııa jáne ınfraqurylymdyq damý mınıstrligi baspasóz qyzmeti uıymdastyrǵan «MIIR PRESS CUP - 2022» týrnırine respýblıkalyq BAQ-tan 7 áıelder komandasy qatysty: «Qazaqstan» RTRK, «Habar» agenttigi, «Jetinshi arna», «Eýrazııa birinshi arnasy», «Baq.kz» aqparat portaly, «Egemen Qazaqstan» jáne «Aıqyn» gazetteri.

Jerebe qorytyndysy boıynsha komandalar eki topqa bólinip, olardyń jeńimpazdary fınalda týrnır kýbogyna talasty.

Bas júlde aqtyq saıysta jeńiske jetken «Qazaqstan» RTRK komandasyna buıyrdy.

Ekinshi oryndy «Jetinshi arna» qyzmetkerleri ıelendi. Qola júlde «Habar» agenttiginiń qorjynynda.

Júldeli tórtinshi oryn «Baq.kz» aqparat portalynyń arýlaryna tapsyryldy.

Jarysqa belsendi qatysqan «Eýrazııa birinshi arnasy» - «Kórermen kózaıymy», «Egemen Qazaqstan» gazeti - «Eń súıkimdi komanda», «Aıqyn» gazeti - «Eń sulý komanda» atalymdaryn ıelenip, baǵaly syılyqtarmen marapattaldy.

«Jarys maqsaty - jýrnalıster arasyndaǵy dostyqty arttyrý, Halyqaralyq áıelder merekesimen quttyqtaý. Sporttyq saıys bolǵandyqtan salaýatty ómir saltyn nasıhattaý. Dostyq bar jerde-ósý bar, birlik bar jerde-bereke bar. Sony qoldap, búgin osyndaı is-shara ótkizip jatyrmyz. Bul jerde mańyzdysy birinshi, ekinshi oryn alý emes, osynda kelip qatysý, bas qosyp, bir-birimen tanysý. Bizdiń de uıymdastyrýdaǵy maqsatymyz – sol», - deıdi QR IIDM baspasóz hatshysy Janjigit Omarhan.

Aıta keterligi, týrnırge Qazaq geophysics jáne Kazakhmys barlau kompanııalary qoldaý bildirdi.

Uıymdastyrý jumystaryna BAQ League jýrnalıster lıgasy atsalysty.

BAQ League - BAQ ujymdary úshin «tımbıldıng». Buǵan deıin mını-fýtboldan toǵyz maýsym jáne voleıboldan chempıonat ótkizgen.

Jalpy alǵanda BAQ League maýsymdaryna Qazaqstannyń túrli óńirlerinen 50-den astam BAQ-tan 700-den astam jýrnalıst qatysty.