Elordada «BAQ etnosaralyq tózimdilikti nyǵaıtý jolynda» taqyrybynda semınar ótedi
ASTANA. Qarashanyń 17-si. QazAqparat /Quralaı Orynbekqyzy/ - Astanada qarashanyń 18-19-y kúnderi L.N.Gýmılev atyndaǵy Eýrazııa ulttyq ýnıversıtetinde Halyqaralyq tózimdilik kúnine oraı «BAQ etnosaralyq tózimdilikti nyǵaıtý jolynda» taqyrybynda semınar ótedi,
dep habarlaıdy QazAqparat tilshisi.
Atalmysh is-sharany Qazaqstan halqy Assambleıasynyń (QHA) hatshylyǵy, QR Mádenıet jáne aqparat, Bilim jáne ǵylym mınıstrlikteri jáne Eýrazııa ulttyq ýnıversıteti uıymdastyryp otyr. Oǵan Qazaqstan men Reseıdiń belgili ǵalymdary men qoǵam qaıratkerleri, QR Parlamentiniń depýtattary, BAQ-tyń bas redaktorlary men qyzmetkerleri, memelekettik organdar men etnomádenı birlestikterdiń ókilderi qatysady. Semınardyń negizgi maqsaty - QHA-nyń 15-shi sessııasynda Elbasy tarapynan usynylǵan El birligi doktrınasynyń jobasyn talqylaý.
Al búgin QR Ulttyq akademııalyq kitaphasynda Reseıdiń ǵylym jáne jýrnalıstıka qaýymdastyǵy men otandyq BAQ ókilderine arnalǵan etnosaralyq jáne konfessııaaralyq tózimdiliktiń qazaqstandyq úlgisi usynyldy. «Kún tártibindegi eń úlken máselelerdiń biri - el birligi, halyq birligi. Ol Qazaqstanǵa ǵana emes, búkil dúnıejúzindegi daǵdarysqa baılanysty. Sońǵy 3 aıdyń ishinde 9 eldiń ókili Qazaqstandaǵy etnosaralyq qarym-qatynastyń qazaqstandyq modeline baılanysty suraqtardy kóterip, ortaǵa salǵan bolatyn», - dedi QHA tóraǵasynyń orynbasary Eraly Toǵjanov.
E.Toǵjanovtyń aıtýynsha, ótken sessııada Elbasy jýrnalıstermen birge, baspasózdiń naǵyz qalamgerlerimen birge arnaıy klýb qurylsa degen oıdy ortaǵa salǵan bolatyn. «Eger osyndaı klýbty quratyn bolyp jatsaq, ol jerde kókeıde júrgen máselelerdi ortaǵa salyp, talqylaı alatyn jaǵdaıǵa jetsek, onyń úlken paıdasy tıedi degen oıdamyz», - dedi ol.
