Elordada Bahreın ınvestıtsııasyna jańa mektep salynady

NUR-SULTAN. QazAqparat - Elorda ákimdigi, Bahreın Patshalyǵynyń Patshalyq qaıyrymdylyq qory jáne «Nurly Astana» Korporatıvtik qory arasynda Nur-Sultan qalasynda jańa mektep salý týraly úshjaqty memorandýmǵa qol qoıyldy, dep habarlaıdy QazAqparat.

Memorandýmǵa sáıkes elordada 1200 orynǵa arnalǵan mektep turǵyzylady. Onyń qurylys jumystaryn «Nurly Astana» Korporatıvtik qory Bahreın Patshalyǵynyń Patshalyq qaıyrymdylyq qorynyń qarjylandyrýy esebinen júzege asyrady. Qurylys aıaqtalǵannan keıin bilim mekemesi qalanyń kommýnaldyq menshigine ótedi. Aldyn ala jospar boıynsha, mektep qurylysy 2021 jyly aıaqtalady.

«Sonymen qatar, bul joba mektep ujymyna 100 jańa jumys ornyn ashýǵa múmkindik beredi. Atalǵan shara qala ákiminiń orynbasary Malıka Bektýrova men «Royal Charity Organization» bas hatshysy Mýstafa Al Saed jáne «Nurly Astana» Korporatıvtik qory dırektory Shahmardan Janbosynovtyń qatysýymen ótti. Arab memleketteriniń qarjylandyrýymen memlekettik mektepter salýdyń tájirıbesi burynnan bar», - delingen Nur-Sultan ákimdiginiń aqparatynda.

Atap ótilgendeı, búginde Birikken Arab Ámirlikteri men Katar memleketiniń qarjylandyrýy esebinen salynǵan mektepter sátti jumys istep jatyr. Atap aıtqanda, olar - 2018 jyly ashylǵan № 85 mektep-lıtseıi jáne 2017 jyly paıdalanýǵa berilgen № 84 mektep.