Elordada azyq-túlik sebeti zattaı emes, aqshalaı berilýde
Aıta keteıik, Memleket basshysynyń tapsyrmasy boıynsha QR Eńbek jáne halyqty áleýmettik qorǵaý mınıstrligi tótenshe jaǵdaı kezeńine azyq-túlik pen turmystyq jıyntyǵyn alýshylardyń tizimin keńeıtti.
«QR Eńbek jáne halyqty áleýmettik qorǵaý mınıstrliginiń 2020 jylǵy 25 naýryzdaǵy 109-shy buıryǵyna sáıkes, búgingi tańdaǵy tótenshe jaǵdaıǵa baılanysty tıisti sanattarǵa 4 aılyq eseptik kórsetkish mólsherinde áleýmettik járdemaqy tólenedi», - dedi Nur-Sultan qalasynyń Jumyspen qamtý jáne áleýmettik qorǵaý basqarmasy «Saryarqa» aýdany áleýmettik járdemaqylar taǵaıyndaý bóliminiń basshysy Saltanat Stanbaeva.
Osy oraıda ol bul tólem birinshi jáne úshinshi toptaǵy múgedekterge, múgedek balalarǵa, sondaı-aq bala jasynan múgedek balany kútip-baǵyp otyrǵandarǵa, sondaı-aq ataýly áleýmettik kómek alatyn otbasynyń 6-18 jas aralyǵyndaǵy balalaryna jáne AÁK alatyn otbasynyń eresek adamdaryna qarastyrylǵanyn eske saldy.
«Bul járdemaqy árbir alýshynyń esepshotyna avtomatty túrde túsedi. Atap aıtqanda, eshqaıda barýdyń nemese habarlasýdyń qajeti joq. Esepshotqa 4 aılyq eseptik kórsetkish mólsherindegi járdemaqy aýdarylady», - dedi S. Stanbaeva.
Nur-Sultan ákimdiginiń málimetine qaraǵanda, tótenshe jaǵdaı kezinde elorda turǵyndarynyń jekelegen sanattaryn azyq-túlik pen turmystyq jıyntyqtarmen qamtamasyz etý aqshalaı tólem (4 AEK) túrinde qarastyrylǵan. Osy oraıda TJ kezeńinde atalǵan tólem 30 myńnan astam qala turǵynynyń jeke esepshottaryna túsirildi.
Eske sala keteıik, 15 sáýirde QR Premer-Mınıstri Asqar Mamınniń tóraǵalyǵymen QR Prezıdenti janyndaǵy Tótenshe jaǵdaı rejımin qamtamasyz etý jónindegi memlekettik komıssııanyń kezekti otyrysy ótti.
Jedeldikti jáne azamattardyń qaýipsizdigin qamtamasyz etý maqsatynda Memlekettik komıssııa Eńbek jáne halyqty áleýmettik qorǵaý mınıstrligi engizgen azyq-túlik jáne turmystyq jıyntyqtardy jeke tulǵalardyń shotyna aqshalaı qarajatty aýdarý arqyly berý týraly usynysty maquldady.
«Óńirlerdiń ákimdikteri usynylǵan tetikke sáıkes kómekti alýshylarǵa aqshalaı qarajattyń ýaqytyly aýdarylýyn qamtamasyz etýi kerek. Karta shottary bolmaǵan jaǵdaıda nemese kómek alýshylardyń jasyna ne múgedektigine baılanysty kelýge múmkindigi bolmasa, sanıtarlyq talaptardy saqtaı otyryp, azyq-túlik jıyntyǵyn úıge jetkizýdi qamtamasyz etý qajet», — dedi A. Mamın.
