Elordada azyq-túlik baǵasyn turaqtandyrýǵa qosymsha 1,2 mlrd teńge bólindi
Nur-Sultan qalasynyń qoǵamdyq keńes otyrysynda turaqtandyrý qorynda saqtaýly turǵan azyq-túliktiń mólsheri týraly saýal qoıyldy.
«Jalpy baǵany turaqtandyrýǵa bizde forvordtyq kelisimsharttar túrinde 4,6 mlrd teńge bólindi. Bul jobada segiz kásipkerlik sýbektisi jumys isteıdi. Sondaı-aq, máslıhat otyrysynda baǵany ustap turýǵa qosymsha 1,2 mlrd teńge maquldandy. Bul berilgen kelisimsharttar. Biz tikeleı fermerlermen jumys isteı bastadyq. Burynǵy mehanızmnen birtindep bas tartyp jatyrmyz», - dedi qalalyq ınvestıtsııalar jáne kásipkerlikti damytý basqarmasynyń basshysy Erlan Bekmyrzaev.
Ákimdik ókili turaqtandyrý qorynyń jumysyn forvordtyq satyp alý tásili arqyly basqarýǵa osydan úsh jyl buryn kirisip bastaǵandaryn eske saldy.
«Áleýmettik kásipkerlik korporatsııasy arqyly tikeleı óndirýshilerge nesıe bólemiz. Óndirýshiler saýda jelilerimen tikeleı baılanysady, sáıkesinshe kúzde alynatyn ónimnen ózimizge qajet mólsherdi aldyn ala qamdap qoıamyz. Ortasha alǵanda, baǵalar dástúrli túrde qańtar-mamyr aılarynda, byltyrǵy ónimniń túbi kórinip, jańasy jetilip úlgermeı jatqan kezde ósedi. Bul jumysty jalǵastyramyz», - dedi basqarma basshysy.
