Elordada azyq-túlik baǵasyn negizsiz kótergen kásipkerler jaýapkershilikke tartyldy
ASTANA. KAZINFORM – Elordada áleýmettik mańyzy bar azyq-túlik baǵasyn negizsiz kótergen 32 kásipker ákimshilik jaýapkershilikke tartyldy. Bul týraly Astana qalalyq saýda jáne tutynýshylardyń quqyqtaryn qorǵaý departamenti basshysynyń orynbasary Ǵalymjan Іlııasov aıtty.
«Saýda komıteti men Astana qalalyq ekonomıkalyq tergeý departamentinen kelip túsken materıaldar boıynsha osy jyldyń 1-toqsanynda 32 kásipker «Saýda qyzmetin retteý týraly» zańnamasyn buzǵany úshin ÁQBtK-niń 204-4-baby boıynsha ákimshilik jaýapkershilikke tartyldy. Onyń ishinde1 mln 218 myń teńgege 8 aıyppul salyndy. 10 kásipkerge qatysty materıaldar qaralyp jatyr», - dedi ol Astana qalasynyń kommýnıkatsııalar qyzmetindegi brıfıngte.
Onyń atap ótýinshe, júrgizilgen jumystardyń nátıjesinde áleýmettik mańyzy bar azyq-túlik taýarlaryna baǵasyna qatysty el Zańyn buzýdyń joly kesiledi.
«Áleýmettik mańyzy bar tamaq ónimderine baǵany memlekettik baqylaý osy ónimderge baǵanyń qoljetimdiligi men turaqtylyǵyn qamtamasyz etý úshin mańyzdy qural sanalady. Ol tutynýshylardyń múddelerin qorǵaýǵa, teris paıdalanýdyń aldyn alýǵa jáne áleýmettik mańyzy bar azyq-túlik ónimderine ádil jáne turaqty baǵa belgileýge kómektesedi. Sondaı-aq, baǵany memlekettik baqylaý ekonomıkalyq turaqtylyqty buzbaý jáne bıznes úshin qosymsha problemalar týdyrmaý úshin saqtyqpen jáne naryqtyq tetikterdi eskere otyryp júrgizilýi tıis ekenin eskerý mańyzdy», - dedi Ǵalymjan Іlııasov.
