Elordada Ázerbaıjan Mámbetovtiń mereıtoıyna arnalǵan «TEATRALL» festıvali ótedi

NUR-SULTAN. QazAqparat – Astanada Ázerbaıjan Mámbetovtiń 90 jyldyq mereıtoıyn atap ótý maqsatynda «TEATRALL» festıvali ótedi. Bul týraly elorda ákimdiginde ótken brıfıngide Nur-Sultan qalalyq Mádenıet basqarmasy basshysynyń orynbasary Nuran Kamzın málim etti, dep habarlaıdy QazAqparat tilshisi.

«Festıval 22-30 qazan aralyǵynda ótedi. Ony qala ákimdigi uıymdastyrady. Sharaǵa respýblıkalyq jáne sheteldik teatrlardan 14 spektakl irikteledi. Spektaklderdi táýelsiz sarapshylar anyqtaıtyn bolady. Búgingi kúni teatrdyń elektrondy poshtasyna 25-ten astam ótinim kelip tústi. Onyń ishinde elimizdiń ár óńiri men Ózbekstan, Qyrǵyzstan, Reseı Federatsııasynan jáne Túrki memleketteriniń halyqaralyq uıymynan ótinimder qabyldandy. Spektaklderge qoıylatyn basty talap – olar Ázerbaıjan Mámbetovtiń qoıǵan pesalary bolýy tıis», - dedi Nuran Kamzın.

Onyń aıtýynsha, qazylar alqasynyń quramyna Qazaqstan, Reseı jáne Qyrǵyzstannyń belgili teatr qaıratkerleri enedi. Sonymen qatar festıvalge sheteldik belgili óner adamdary shaqyrylady.

Foto: facebook.com/nursultanakimat