Elordada Ázerbaıjan Demokratııalyq Respýblıkasynyń 100 jyldyǵy toılandy
«Ázerbaıjan Respýblıkasy Prezıdentiniń ókimimen 2018 jyl Ázerbaıjan Demokratııalyq Respýblıkasynyń jyly bolyp jarııalandy. Bul mereke memlekettik deńgeıde jyl boıy atalyp ótiledi.
Ázerbaıjan Demokratııalyq Respýblıkasynyń 1918 jyly qurylýy halqymyz úshin tarıhı oqıǵa sanalady. Memlekettiliktiń kóne dástúrine ıe ázerbaıjan halqy tarıhtyń yrqymen belgili bir kezeńde iri ımperııanyń quramynda májbúrli túrde boldy», - dedi resmı qabyldaýda sóz sóılegen Ázerbaıjannyń Qazaqstandaǵy Tótenshe jáne ókiletti elshisi Rashad Mamadov.
Elshi 1918 jyldyń mamyrynda Ázerbaıjannyń táýelsizdik deklaratsııasynyń qabyldanǵanyn eske saldy.
«Qaıtadan qurylǵan ÁDR ózine alǵan tarıhı jaýapkershilikti adal júzege asyrdy. Birinshi parlament pen úkimet qurylyp, shekarani belgiledi, eldiń týy men eltańbasy jasaldy jáne ázerbaıjan tili memlekettik til bolyp jarııalandy», - dedi ol.
Sonymen qatar, Rashad Mamadov Qazaqstanmen Ázerbaıjan arasyndaǵy yntymaqtastyqtyń joǵary deńgeıin atap ótip, Elbasy Nursultan Nazarbaevtyń ótken jylǵy Bakýge sapary ekijaqty yntymaqtastyqty damytýǵa tyń serpin bergenin basa aıtty.
Qazaqstan tarapynan sóz sóılegen Energetıka mınıstri Qanat Bozymbaev búginde Ázerbaıjan ekonomıkanyń barlyq baǵytynda zor jetistikke ıe bolyp, áleýmettik turaqtylyq pen azamattardyń ál-aýqatyn jaqsartýǵa qol jetkizgenine aıryqsha nazar aýdardy.
«2017 jyly Qazaqstan menÁzerbaıjan arasyndaǵy dıplomatııalyq qarym-qatynastyń ornaǵandyǵynyń 25 jyldyǵy atalyp ótildi. Osy jyldar ishinde elderimiz tarıhı ortaqtastyq pen ǵasyrlarǵa jalǵasatyn baılanystardy saqtap qana qoımaı, teń quqylyq pen ózara tıimdi yntymaqtastyq ustanymdaryn basshylyqqa ala otyryp, baılanystaryn jańadan qurýdy úırendi. Mundaı yntymaqtastyqtyń negizi Nursultan Nazarbaev pen Geıdar Álıev qalaǵan senim men ózara túsinistiktiń joǵary deńgeıi sanalady», - dedi Qanat Bozymbaev.
