Elordada azamattardyń jeńildikti sanattaryna arnalǵan ataýly kólik kartalaryn taratý merzimi uzartyldy
ASTANA. QazAqparat - 3-15 maýsym aralyǵynda ataýly kólik kartalaryn Respýblıka dańǵyly, 31 meken jaıy boıynsha «Jastar» saraıynda ornalasqan pýnkten alýǵa bolady, dep habarlady Astana ákiminiń baspasóz qyzmeti.
Kólik kartasyn almaǵan azamattar jeńildikpen júrý quqyǵyn rastaıtyn qujattardy kórsetip, qoǵamdyq kóliktermen (qala mańyna qatynaıtyndardan basqa) tegin júre alady. Al mamyr aıynda fototirkeýden ótken azamattar kólik kartalaryn atalǵan pýnkten alyp kete alady, fototirkeýden ótpegen azamattar jaqyn arada ashylatyn arnaıy kassalarǵa júginýi kerek.
Jalpy, azamattardyń jeńildikti sanatyna arnalǵan 54 myń ataýly kólik kartasyn berý josparlanǵan. Qazirgi kezde 42 myń karta taratyldy.
Buryn habarlanǵandaı, kartalar tegin, sondaı-aq, elordalyq baǵdarlar - qalalyq jáne ekspress marshrýttarmen (qala mańyna qatynaıtyn marshrýttarmen júrý oqýshylar men jeńildikpen júretin azamattar úshin aqyly bolyp qalady) júrý úshin toltyrý qajettiliginsiz taratylady.
Eske salaıyq, 4 mamyrda Astra Plat elektrondy jolaqy tóleý júıesin engizý aıasynda azamattardyń jeńildikti sanattaryna kólik kartalary berile bastady. Erejelerge sáıkes, Astana qalasynyń turǵyndary jáne memlekettik zeınetaqy tóleý ortalyǵynyń qalalyq fılıalynan áleýmettik tólemder alatyn azamattardyń tómende kórsetilgen sanattary qoǵamdyq kólikpen tegin jol júredi:
- jasyna qaraı jáne eńbek ótili boıynsha zeınetkerler;
- jasyna qaraı zeınetke shyqqandar jáne asyraýshysynan aıyrylýy boıynsha memlekettik áleýmettik járdemaqy alatyndar;
- kóp balaly analar men kóp balaly otbasylar;
- múmkindigi shekteýli tulǵalar, 18 jasqa deıingi múgedek balalar.
- UOS-yna qatysqandar men múgedekteri, olarǵa teńestirilgen tulǵalar;
