Elordada az qamtylǵan otbasylarǵa beriletin turǵyn úı járdemaqysy ósti

NUR-SULTAN. QazAqparat - Nur-Sultan qalasynyń ákimi Altaı Kólginov arnaıy sanattaǵy turǵyndarǵa beriletin turǵyn úı járdemaqysynyń mólsheri kóbeıgenin málim etti, dep habarlaıdy QazAqparat elorda ákimdiginiń resmı saıtyna silteme jasap.

«Áleýmettik az qamtylǵan otbasylarǵa qoldaý kórsetý – bizdiń basty mindetimiz. Osy sanattaǵy jandarǵa toqsan saıyn kommýnaldyq qyzmetterdi tóleý úshin turǵyn úı járdemaqysy beriledi. Jyl basynan beri bul somany eki esege jýyq – 10 myńnan 18 myń teńgege deıin (bul jylytý maýsymyndaǵy soma, al basqa maýsymdarda kómek mólsheri tómen) ulǵaıttyq. Bul kómek zeınetkerlerge, erekshe qajettiligi bar otbasylarǵa, múgedek jandarǵa, tolyq emes otbasylarǵa, kópbalaly otbasylarǵa jánebasqalarǵa beriledi» delingen habarlamada.

Ótinish qabyldaý jáne atalmysh memlekettik qyzmet kórsetý nátıjelerin berý toqsanyna bir ret júzege asyrylady.

Turǵyn úı járdemaqysyn alý úshin azamat (nemese onyń ókili) «Azamattarǵa arnalǵan úkimet» memlekettik korporatsııasy nemese elektrondyq úkimet portaly (www.egov.kz) arqyly ótinish («áleýmettik qamtamasyz etý» - «otbasylarǵa kómek» - «turǵyn úı kómegin taǵaıyndaý» bólimi) beredi.

«Osyǵan deıin jeke sektor turǵyndaryna kómirden gazǵa kóshýi úshin beriletin áleýmettik kómek mólsherin 260 myńnan 400 myńǵa deıin arttyrý josparlanyp otyrǵany týraly aıtqan edim. Bul bastamany jaqyn ýaqytta qalalyq máslıhattyń qaraýyna ótkizemiz», – deıdi elorda ákimi.