Elordada Aıvazovskıı týyndylary jańa formatta usynyldy
ASTANA. KAZINFORM — Astanada XIX ǵasyrdyń áıgili teńiz sýretshisi Ivan Aıvazovskııdiń shyǵarmashylyǵyna arnalǵan ımmersıvti mýltımedııalyq kórme ashyldy. Ekspozıtsııa beıne, mýzyka jáne kórkem baıandaý arqyly sýretshiniń shyǵarmashylyq álemin ashady.
Lumiere-Hall mýltımedııalyq murajaıynyń ákimshisi Ánel Shaǵyrovanyń aıtýynsha, kórme Aıvazovskııdiń shyǵarmashylyǵyn zamanaýı tehnologııalar arqyly jańa qyrynan tanystyrady.
— Aıvazovskıı — teńizdiń tabıǵatyn erekshe sezine bilgen sýretshi. Ol teńizdi tabıǵat aıasynda otyryp emes, jadyna súıenip beınelegen. Sonyń arqasynda teńizdiń minezi men qýatyn dál jetkize aldy, — dedi Ánel Shaǵyrova.
Ekspozıtsııa eki zaldan turady. Birinshi zalda Aıvazovskııdiń kartınalary, eskızderi jáne shyǵarmalaryna qatysty aqparat usynylǵan. Ekinshi zalda týyndylar úlken ekrandarda mýltımedıalyq formatta kórsetilip, kórermenge ımmersıvti áser syılaıdy.
— Beıne, mýzyka jáne dybystyq súıemeldeý birtutas kompozıtsııa quraıdy. Sonyń nátıjesinde kórermen ózin teńizdiń ortasynda júrgendeı sezinip, shyǵarmanyń emotsııasyn tolyq qabyldaı alady, — dedi murajaı ákimshisi.
Mýltımedııalyq kórsetilim shamamen bir saǵatqa sozylady. Baǵdarlamada sýretshiniń alǵashqy týyndylarynan bastap úzdik shyǵarmalaryna deıingi joly men álemdik ónerge qosqan úlesi qamtylǵan.
— Biz onyń týǵan jeri, shyǵarmashylyǵyna shabyt bergen faktorlar jáne kásibı shyńǵa jetý joly týraly baıandaımyz. Bul — sýretshiniń ómiri men shyǵarmashylyǵyn jan-jaqty tanystyratyn joba, — dedi uıymdastyrýshylar.
Aıta keteıik, Ivan Aıvazovskıı ómirinde alty myńnan astam kartına salǵan. Kórmede keńinen tanymal týyndylarymen qatar, eskızderi men alǵashqy nobaılary da qoıylǵan.
Kórme tamyz aıynyń sońyna deıin jalǵasady. Ekspozıtsııa kún saıyn saǵat 11:00-den 21:00-ge deıin ashyq.
— Buǵan deıin ótken Vınsent van Gogtyń ımmersıvti kórmesin bir aıda 30 myńnan astam adam tamashalady. Bul joba da kórermenniń joǵary baǵasyna ıe bolady dep senemiz, — dedi Ánel Shaǵyrova.
Aıta keteıik, buǵan deıin Ulttyq mýzeıde de «Afınadan Astanaǵa deıin. Vladımır Potanın kollektsııasyndaǵy Olımpıadalyq artefaktiler» atty kórme ashylǵan edi.
